2295/2022-2023

Champhai, the 12th October, 2022: Champhai Grape Growers Society (CGGS) ten Grape Wine Rules thar lawmna Packing Hall, Champhai Winery, Tlangsama an buatsaih chu vawiin chawhnu khan Excise & Narcotics Minister Dr. K.Beichhua chuan khuallian niin a hmanpui.

Khuallian Excise & Narcotics Minister Dr. K.Beichhua chuan wine rule thar siam avangin Champhai mipui chauh nilo Mizoram pum a lawm thu sawiin, politics kal dik leh fuh hmangin ram hmel a thlak danglam theih thu leh a siam that kawnga tanrual a tul thu a sawi a. Mizoram Liquor Prohibition Rules, 2022 buaipui dan chungchangte sawiin, hemi bik zirchiang tura High Level Committee din a nih thu leh a zau thei ang bera inrawnkhawmna neih a nih hnuah rawtna thlente ngun taka ngaihtuah nawn fo a nih hnuah pawm a nih thu a sawi bawk.

Grape chingtute chu grape quality tha leh changkang zawk, thianghlim zawk, tam leh hrisel zawk thar theuh tum turin a sawm a. Ram tana hmelma lian ruihhlo do kawngah tanrual a tul takzet thu sawiin, ruihhlo do kawngah tumah kan ralbang bik thiang lova, engtik lai pawhin min tibuai thei reng a, a la tlai hma hian kan zavaiin thahnemngai takin i do tlang zel ang u, tiin mipuite a sawm a. Champhai District mipuite chu ruihhlo leh a kaihhnawih do kawnga theihtawp chhuaha sawrkar tawiawm tlat thin turin a sawm a ni.

He hun hmanpuitu Health & Family Welfare Board Vice Chairman Dr. ZR.Thiamsanga chuan grape chingtute hmakhua ngaiin an tana tha tur Sawrkarin ngaihtuahin ngaihhnathiamna hun engemawchen a kalpui hnuah dan thar duan a ni a, hemi avanga grape chingtu leh zuarte chunga harsatna thlengte bawhzuiin wine rule thar a siam sak thu a sawi a. Champhai Grape Growers Society-te hmalakna ngaihlua Baptist Church of Mizoram (BCM) ten Sacramental Wine chungchanga thawhdunna thuthlung tha tak an nei chhunzawm zel chu lawmawm tiin, bialtu MLA anih angin BCM te chungah lawmthu a sawi a. Wine rule thar nei thei tura hmalakna leh bawhzui anih dante tarlangin Excise & Narcotics Minister leh Sawrkar hotute hmalaknaah lawmthu a sawi a. Grape chin chawilar nan Grape Festival pawh Hnahlan ah neih tuma ruahmanna neih a ni, a ti bawk.

Hrileng vanga harsatna tawh mek karah Sawrkarin theihtawp chhuaha hmasawnna a kalpui thin thu leh nitin khawsak mamawhte a ngaihtuah thin thu sawiin, Champhai District chhunga sawrkar hmalaknate leh Health Department kaltlanga Mizorama hmalakna tlangpuite a tarlang a. Wine dan thar hnuaiah grape chingtuten hmakhua eng tak an neih thu sawiin, tun aia thahnemngai leh zau zawka hma la turin a chah a ni.

He hun hmanpuitu Commerce & Industrial Development Board Vice Chairman Pu K.Laldawngliana chuan Grape chingtute hmalakna chu a lo hriat tawh thin thu leh phurawm a tih thu sawiin, grape wine rule thar nei tura tanrualna chu fakawm a ti a. Mizoram pumin an lawmpui thu sawiin, an kalzelna turah sawrkarin theihtawp a chhuah zel dawn thu a sawi a. Ram hmangaihna tak tak, a taka thawhchhuah duh leh hlemhletna um lo te penchhuaka ram tana thawhchhuah a tul thu a sawi a. Tlangsam Grape Growers Society-te hnenah awmpuina pawisafai a hlan nghal bawk.

He hun hi Pu HS.Vanlalfakzuala, Chairman, CGGS chuan a kaihruai a. Rev. PC.Lalropuia BCM, Champhai Pastor Bial-in hunserh a hmang a. Pu R.Laltanpuia, Asst. Secretary, CGGS in kalkhawmte lawmna hun a hmang a. Pu C.Zohmingliana, General Secretary leh Pu Hrilchunglura, General Manager-te hnen atangin report ngaihthlak a ni a. Horticulture Director Dr. Elizabeth Saipari leh District Bawrhsap Pu James Lalrinchhana te pawhin thu a sawi bawk a. Pu C.Malsawma, Treasurer, CGGS in lawmthu sawiin hun a khar a ni.

Kum 2007 khan Champhai Grape Growers Association tih thin chu Winery din a nih dawn avangin Champhai Grape Growers Society ti a thlak a ni a, Firms & Society-ah an inziahlut a. Khatih laia Agriculture Minister Pu H.Rammawi, State Planning Board Vice Chairman ni mek hmalaknain MIP sum cheng nuai 83 hmanga bultan niin, kum 2010 atang khan Grape quintal 918 leiin bul an tan a, kumin hian quintal 1144.98 an lei tling a ni. Champhai Grape Growers Society-ah hian Governing Board Member 15 awmin kum 2 danah inthlan thin a ni a. Tun dinhmunah hian Champhai Grape Growers Society-ah hian member 135 awm mekin, Staff leh Worker mi 30 an awm mek bawk a. Champhai Grape Growers Society hnuaiah hian Branch 9 an awm mek bawk a ni.