Election Commission of India thupek bawzuina in vawiin khan Champhai GM Higher Secondary School ah SVEEP Special Drive 2017 Awareness Campaign hun hman a ni. 

District Election Officer, Champhai DC ni bawk Pu Vanlalngaihsaka IAS chuan zirlai kalkhawm te hnenah vote thlak pawimawhna sawiin Democracy rama khua leh tui tha ni tur chuan vote thlak hi kan tihmakmawh a nih thu a sawi a. “Electoral Roll a kan hming a chuan hi kan chanvo (Right) a ni a, Vote thlak hi kan tih tur (duty) a ni” a ti. India khua leh tui diktak, dan ina a phal bawk si te chu Electoral Roll a hming inthunlut vek turin kalkhawm te chu a ngen bawk a ni. 

He hunah hian Pu Lalremruata Kullai, Election Officer chuan SVEEP Special Drive 2017 chungchangah zirtirna a pe a. He Special Drive ina a tum ber chu India khua leh tui diktak kum 18-21 inkar vote la neilo te tan Form 6 hmanga Electoral Roll a inthunluh a nih thu a tarlang a. Hemi bakah hian mipuite tana Form 6 hmanga Constituency danga insawn , Form 7 hmanga hming paih (deletion), Form 8 hmanga Roll a hming awm tawh hming emaw adrees leh thil dang siamthat (Correction) leh Form 8A hmanga Constituency khat chhunga polling Station danga in sawn (transposition) chungchangah te zirtirna a pe bawk a ni.

Heng form te hi BLO, AERO, ERO leh District Election Office (BDO,SDO(Civil) leh DC) office atang te in a lakchhuah theih a, zawhna leh hriatthiam loh neih chuan (0389) 1950 (toll free) ah hian a zawhfiah theih a ni. Election Commission of India thupek ang chuan he Special Drive Campaign hi July 1 atanga ni 31,2017 chhungin zawh hman tura tih a ni.