Vawiin khan MZP Hqrs Mamit buatsaihin Mamit khawpui chhunga zirlai titha HSLC Disctintion a pass te  leh HSSLC Disctintion leh First Division a tlingte chawimawina hun neih a ni a, Pu Lalruatkima, MLA chuan khuallian niin he hun hi a hmanpui. 

Khuallian Pu Lalruatkima MLA chuan zirlai tithate chawimawi an phu anga, chawimawina chang hria MZP Hqrs Mamit te hnenah lawmthu a sawi a, Mamit khua chu tunhma lamah zirna lamah kan hnufual rei hle a, tunah chuan Kohhran hmalakna te avangin School tha tak tak te kan lo nei ta a, chawimawi tlak zirlai tha tak tak an lo awmta chu lawmawm a tihthu sawiin heihi hmasawnna hmel duhawm tak a ni a ti. Chutihrual erawh chuan Mamitah Science leh Commerce zir theihna a awm thuai a beisei thu a sawi. 

Zirlai te chu vawiina chawimawina mai hi hlawhtlinna tluantling a la nih loh thu hre tur leh hmalama thawhrimna tur tam tak paltlanga Degree tha zawk nena Mamit khua tihmingtha tu ni zel turin a chah a, kan hlawhtlinna tur min daltu hrang hrang Social Media ,ruihtheih thil leh nulat tlangvalna lakah  te a tawk fang hria a, hrehawm hmasak loh chuan hlawhtlinna a awm lo a ni tih chu engtik lai pawha vawng reng turin a chah a,  kan hnam tawng mizo tawng chu suasam lo a, humhalh tu ni zel turin a chah bawk a ni. 

Dr Zothankhuma Chhakchhuak pawhin he hun hi khualzahawm niin a hmanpui a, zirlai te fuihna thu leh eng kawng pawh zawh dawn ila  hriselna a pawimawh zia  sawiin, Malaria leh Dengue laka inven dan tur hrang hrangte a tarlang bawk.Pu Lalropuia President MZP Hqrs pawhin zirlai titha chawimawi tlak chawimawi zel tura MZP Hqrs an in huam thu leh hetiang hun hi buatsaih zel tum a ni a ti. Pu Joseph Lalremruata Adviser MZP Hqrs Mamit pawhin zirlai fuihna thu a sawi bawk a ni. 

Vawiina Chawimawi tak zirlai te hi HSLC atangin mi 6 leh HSSLC atangin mi 17 an vain mi 25 an ni a, he hunah hian Mamit khawpui chhunga zirlai te leh nu leh pate an tel  a ni.