Champhai Deputy Commissioner Pu Vijay Kumar Bidhuri chuan kar kalta Inrinni a Champhai Civil Hospital sak lai mek bang rem chhutchhiat chungchangah vawiin khan a office-ah meeting a ko va.

He Hospital sak lai mek bang rem nana hman leirawhchan te chu tha tawk lova ngai a mi tuten emaw an lo chhu chhe ta mai chu pawi a tih thu a sawi a. DC chuan Hospital hi mipuiten chhiatna chi hrang hrang lirnghing emaw, thlipui emaw, chhiatna dang engpawh a thlen thulha mipuiten inhumhimna atana an pan tur leh damlote enkawlna hmun tur a ni a, chuvangin building sak dang zawng aiin a tha in a him bik tur a ni a ti a. Hospital sak mek chungchangah hian Health Minister ngei pawhin a tha thei ang bera sak a nih theihna turin vawi tam tak a hmun ah a tlawh tawh a, hmanraw tha lo nia a hriat te pawh a lo hnawl sak tawh thin a ni tiin amah leh Champhai mipuite pawhin building tha tak neih chu an duh thusam vek a ni ngei ang a ti a.Mi thenkhatten mahni thu a lo vuak chhiat ve mai erawhchu dan kalh a nih thu sawiin a chhe lai thiattu tur dik tak, dan leh thupek kengkawhtute kutthlak nghah zawk mai tur a ni a ti. Bang rem nan a leirawhchan hman te chu a chhiat leh a that finfiah turin PWD ten lam kaltirin naktukah Aizawl pan pui a nih tur thu meeting ah hian a sawi a ni.

Vawiin meeting ah hian Additional DC Pu Zoengsanga, Addl. SP Pu Ngursangliana Sailo, PHE EE Er. K. Zohmingliana, CMO Dr. C. Zirliana, PWD SDO Pu Lalfakzuala leh SDPO Pi Vanlalzawni te bakah bang thiattu nia hriat mi engemaw zat an tel a ni.