Champhai Kanan Veng leitawlh thin chu a chet tanna hmun atangin Rangva bundle 100 zet hmanga khuh hul hna thawh mek niin, fur khua a kan deuh tak avangin helai hmun lei tawlh thin pawh a ziawmin, kawngpui hnawhtu leilung thenfai hna pawh chawlhsan rih a ni a, Vengthlang panna kawngpui pakhat erawh leitawlh hian a hnawhping rih thung.

Helai leitawlh thin kopang lei chhah lutuk chu thenfai thawkhat tawh a ni a, Fur ruahtui tla-in lei chhungril a luh vang leh chunglam hmun zau zawk a chet zel vangin thenfai hna kallai chu chawlhsan rih a ni a, he lei tawlh hian champhai chak lakna ber kawngpui a hnawh pin thin vangin lirthei kal vel khaihlakna nasa lutuk a thlen lohna tura leiko chhah lutuk tawlh mai thei tur chu thenfai thawkhat tawh a ni.

Kum 2013 August thla a helai hmun leichetna chin kha tunah hian a che nawn leh tak avangin, hun engemaw chen leikhi chawl tawh chu kumin fur ruahtui tlak tam chinah chunglam lei a tlahniam leh a. Leimin danna tura Leitawlhna hmuna tui paihna (Tuihawk luankawr) chhawr dawh siam chu a then a khik chah bakah leitla hniamin a hnawh a. Lei khikna lai Silpaulin hmanga khuh hul a ni chungin leitawlh hi zawi zawiin a chet rengtho avangin Lei khichat intanna atangin Rangva hmanga khuh hul hna thawh mek a ni.

Leikhi kara ruahtui a luh tam chang apianga leitawlh hi a chet nat zual thin avang leh New Saron panna kawngpui chu a hnawhpin leh vek vangin hnuai lam atanga lungrem hnathawh kallai pawh chawlh lailawk rih niin, kawngpui hnawhpingtu leilung leh chirhdiakte thenfai zel a ni a, leitawlhna hmunah hian lei paihna khawl pawh chhawp reng a.