Vawiin khan Trade & Commerce, Industries etc changtu Parliamentary Secretary Pu Joseph Lalhimpuia chuan Lunglei Super Market sak that tur leh hmun pawimawh dangte a tlawh.

Parliamentary Secretary Pu Joseph Lalhimpuia hian Lunglei Super Market sak thatna tur 14th Finance Commission atanga cheng Vaibelchhe10 ruahman fel sa tawh chu sawrkar laipuiah Ministry an inthlak avangin a sukuk a, nimahsela Chief Minister Pu lal Thanhawla thahnemngaihna avangin tunah hian NLCPR atangin cheng Vaibelchhe 20 beisei mek a ni a, DPR siam a ngaih avanga DPR siam dan tur enfiah mek a nih thu a sawi. Hei bakah hian Parliamentray Secretary hian Rs. 4,60,09,244 senga sak tur Chanmari Indoor Stadium hnathawh kal mek chu a hmunah a tlawh bawk a. He Indoor Stadium sak hna hi 30% vel zawh tawh niin, sak zawh a nih hunah Basket Ball Court 1, Badminton Court 3 bakah a hnuaiah Sikul, Dining Hall leh Motor Parking awm tura ruahman a ni dawn a ni.Indoor Stadium panna kawng zauh dan tur leh siamthar dan tur te pawh a en nghal a, hemi bakah hian cheng Vaibelchhe 3 senna tur Weaving Centre sakna hmun tur Chanmari Veng-a mi pawh Pu Joseph Lalhimpuia hian a tlawh nghal bawk.

Parliamentary Secretary Pu Joseph Lalhimpuia'n heng hmun a tlawhnaah te hian Trade & Commerce Jt. Director Pu HD Lalrintluanga leh DIC General Manager Pi Lalrodingi, SE PWD Pu Bowman, EE PWD Pu Maipa leh a kaihhnawih department officials dangten an tawiawm a ni.