Mizoram Football Association chuan nithum chhung awh tur FIFA & AIFF khualtha a thleng a, vawiin khan Mizoram Football Association Office, City Park ah MFA President  Pu Lal Thanzara, Health Minister leh Mizoram Football Association Executive Committee te nen inkawm khawmna neih a ni a, Mizorama Football in hma a sawn theih dan tur leh hmalak tumna mai bakah zirchianna hun an hmang.

FIFA & AIFF atanga lokalte chu  Pu Shaji Prabhakaran, Development Officer, All India Football Association (AIFF); Pu Vicent Subramaniam, Technical Director FIFA South East Asia Region; Pu Sunando Dhar, CEO I-League leh Pu Savio Medeira, India U23 Coach te an ni.

MFA President Pu Lal Thanzara chuan hetianga hun duhawm tak Mizoramin a tawng chu lawmawm a ti a, FIFA & AIFF hial atanga khualtha Mizoramin a nei chu Football ah hmasawnna a awm belhchhah theih ngei a beisei thu a sawi.

He inkawmna ah hian Pu Shaji Prabhakaran-a'n kaihruaiin, an lokal chhan leh hmalak an tum dan te, Mizoram FA hnuaia Technical Officer leh Professional Marketing lam khawih tur dah an tum thu leh tun tuma Mizoram FA nena an inkawmna atanga hei hi a taka kalpui tum a ni bawk thu a sawi a. I-League CEO Pu Sunando Dhar pawhin  Mizoram chuan hmalam hun eng tak a nei a, tunhnaia result tha tak tak  neih anih  avanga he project ah hian telh an nih thu a sawi a ni.

Mizoram FA Hony. Secretary Pu Lalnghinglova Hmar chuan Mizoram football in hma a sawn dan leh hmalak zel an tum dawn a sawi a, football in hma a sawn lehzual theihna tura Mizoram in mamawh a neihte FIFA &AIFF hotute a lo hrilh bawk a ni.

AIFF chuan Pilot Project siamin FIFA Under 17 World Cup 2017-a a thlengtu tur state paruk-a hmasawnna a awm theih nan hma an la a, tunhnai kum 3/4 chhunga Mizorama football in hma a sawn avangin he project ah hian Mizoram telh ve a ni.