No.6500/2020-2021

Dated Champhai, the 11th November, 2020: Agriculture Minister Pu C.Lalrinsanga leh Law Minister Pu T.J.Lalnuntluanga hova Mizoram hmun hrang hranga Leilet-Wet Rice Cultivation (WRC) te, buh leh thlai chinna tura humhalh zel anih theihna tur leh Notified Town Area huamchhung bika Leilet awmte buh leh thlai chinna tur bik atan chauha hman chhunzawm zel anih theihna tur kawnga inrawnkhawmna, August Ni 3, 2020 a neih thurel bawhzuina kalzelah  vawiin khan Champhai Bawrhsap Pi Maria C.T.Zuali hovin Champhai zawl Leilet humhalh dan tur chungchang sawihona D.C Conference Hall, Champhaiah neih a ni a. He hunah hian Pu Rohmingthanga Colney, Director (Crop Husbandry) Agriculture Department pawh a tel a ni.

Bawrhsap Pi Maria C.T Zuali chuan Champhai Leilet phaizawl humhalh kawnga   hmalakna thar thawh tum a nih thu sawiin, Covid-19 hrileng leh ramri khar  chuan intodelh kan ngaihzia a tilanga, buh leh thlai kan thar theihna hmunte chu a theih chen chenah kan humhalh tlat angai a ni, a ti. Sawrkarin Leilet humhalh a tharthawh leh chu lawmawm a tih thu sawiin, Loneitute  fuih thar leh a ngaih thu pawh sawiin, hlawhtling taka Leilet leh a chhehvelte humhalh tur chuan kan zavaia thawhho a ngai hle dawn a ni,  a ti bawk.

Pu Rohmingthanga Colney, Director (Crop Husbandry) Agriculture Department chuan Leilet leh a chhehvelte zirchianga, humhalh anih theihna kawnga hmala tura sawrkar tirha lokal an nih thu sawiin, hlawk zawka buh leh thlai thar thei tura Champhai Leilet tihzauh hna nasa taka thawh a lo nih tawh thin dante sawiin, buh leh thai tharna tura buatsaih Leilet chu thil dang atana hman a  rem loh thu a sawi a. Leilet zawlte uluk taka Survey neih a ngaih thu sawiin, hemi kawngah hian Land Revenue & Settlement Department  nena intawiawm tlat a ngaih dawn thu a sawi bawk. 

Buh leh bal tam zawk thar chhuak tura Sawrkarin hma a lak mek laiin Mizoram-a leilet hmun thenkhatah thil dang, buh leh thlai chinna atan ni lova hman a ni mek chu  ‘The Mizoram Land Revenue Act, 2013’ hmanga humhalh  sawrkarin a tum a. Mizoram-a leilet thenkhat buh leh thlai chinna atan ni lova hman a ni hi Sawrkar chuan pawi a tiin tihtawp dan tur kawng a zawng meka, hemi atana hma la tur hian Director of Agriculture (Crop Husbandry) Pu Rohmingthanga Colney kaihhruaina hnuaiah Task Force  din tawh a ni a, Task Force hian an thil hmuh leh zirchhuahte sawrkarah an thehlut leh dawn a ni.

Vawiina Champhai Bawrhsap hova meeting-ah hian a bul tanna turin Champhai zawl leilet buh leh thlai chinna atana mimal hnena pekte, ‘The Mizoram Land Revenue Act, 2013’ leh Sawrkar phalna ni lova thil dang atana hmante zawn chhuaha, dan bawhchhiate chungah a tul anga hremna lekkawh nise tih a ni a. Tun dinhmuna Champhai leilet zawl, buh leh thlai chinna atana hman mekte chu Agriculture Department leh Land Revenue & Settlement Department  tangkawp ruahmannaa teh chhuah thar leh vek nise, heng leilet zawlte hi buh leh thlai chinna atan bak thil danga hman a nih tawh lohna turin ‘The Mizoram Land Revenue Act, 2013’ chu khauh taka kenkawh zui nise ti a rel a ni.

He meeting-ah hian Task Force Member Pu Lalsanglura Sailo, DAO  Aizawl District, Pu Lalnunfela Chawngthu, SDO Sadar Champhai, Pu Vanlalchhuanliana, Settlement Officer, Champhai District, Pu George Lalthanngura, DAO Champhai leh Officer dangte an tel a ni.