Vawiin khan Champhai khawpui leh a chhehvel cheibawla hmasawnna ruhrel siam dan tur relin Champhai Master Plan Committee chu Pu TJ Lalnuntluanga, Minister of State for Law and Judicial, Environment Forest & Climate Change, Transport Department leh Champhai South bialtu MLA nibawk hovin DC Conference Hall-ah an thukhawm.

Pu TJ Lalnuntluanga chuan Champhai khawpui thanzelna leh nakin hun ngaihtuah chunga Champhai Master Plan tharthawh leh anih thu sawiin, a bul tanna chauh la ni mahase hlawhtling  tur chuan a tak taka hnathawh angai ani, a ti a. UD&PA Department lama mithiamte kaihhruainain   zirchianna  zau zawk leh mipuite ngaihdan lak anih dawn thu a sawi a. Khawpui remfela cheibawl hna chu a bultanna mai a la nih avangin mithiam leh khawtlanga mithahnemngaite chu Champhai khawpui Master Plan leh Leilet vawnhima tihchangtlun tumna kawngah thahnemngai taka hotute  tawiawma thurawnte pe zel turin a sawm a. Ngaihdan hrang hrang awm mahse a tha ber tur kalpui anih theihna turin line department hrang hrang leh khawtlang aiawhte inthuruala thawhho angaih dawn thu a sawi bawk. Zirchianna  peihfel anih ve leh hmachhawpte ngaihtuahna zau zawk senga Committee-in a zirchian leh tur thu sawiin, tihtur leh hmabak la awmahte ngaihtuahna nasa zawk senga thil tha leh tangkai zawk zirchhuah tum theuh turin a chah a. District Administration   viak tha tak takte kaihhruaina hnuaiah  puitlin ngei anih theih a beisei thu sawiin, Department kaihhnawih, khawtlang hruaitu leh mipuite tawiawmna a ngen a. Champhai chu Mizorama  Building regulations nei hmasa ber ni thei tura ngaihtuahna sen anih thu leh Road Safety Council-te pawh chak zawka kalpui a tul thu a sawi a. Khawpui thangzel tur ngaihtuah chung zela Leliet phai vawnhim bakah,  khawpuiin a kentel mamawhte  dahpawimawh chung zela hmalak tum anih thu a sawi bawk.

Champhai Bawrhsap Pu S.L Naveen chuan kalkhawmte lawmna thusawiin, Law and Judicial Minister-in Champhai hmasawnna leh mamawhte hriaa Champhai Master Plan Committee a rawn ho thei chu lawmawm a tih thu a sawi a. Champhai Master Plan tihpuitlin anih theihna turin sawrkar department  hrang hrangte chu tawiawm tlat turin a chah a ni.

He hunah hian Pi R.Lalhmangaihzuali, Asst Director UD&PA chuan Master Plan awmzia, siam dan leh hemi kaihhnawiha hriattur tangkaite tarlangin, Champhai Master Plan tura ruahmanna neihte a sawifiah a. Champhai Master Plan tur chu GIS hmanga siam tur anih thu leh huapzau tak mipuite tana tangkai thei tur ber leh nakin zel thlirlawka buatsaih tum anih thu a sawi a. Meeting chuan Champhai khawpui tawt zel tur venna atan Champhai Town area huam chhung bika Lirthei register thar tur zawng zawng ten DTO a ziahluh dawnin mahni veng VC theuhte atangin  Lirthei dahna an nei ngei ani tih hriatpuina lehkha an keng ngei tawh tur a ni tiin a rel a. Lirthei dahna  nei ngei tih hriatpuina lehkha neilote chu DTO-in  a register sak theih tawh dawn loh thu tarlan ani bawk. Zawhna leh chhanna hunte siam niin, Champhai khawpui mamawh leh tul nia hriat hrang hrangte inpawhtlang taka sawihoa harsatna chinfel anih theih dan turte ngaihtuahho a ni.

Vawiin Meeting-ah hian Pu Rex Zarzoliana Vanchhawng, SP Champhai; Pu Zoremthara Ralte, SDO Sadar; Sawrkar Department hrang hrang hotute, NGO leh VC te an tel a ni.