Vawiin chawhnu khan Information & Public Relations Minister Pu Lalruatkima chuan Ramhlun Indoor Stadium-ah Pu R.Chaldailova lehkhabu ziah ‘Mizo Pi Pute Nunkhua’ a tlangzarh.

Information & Public Relations Minister Pu Lalruatkima chuan thu sawiin, pi pute nunzia kalsan sawifiah tak siloh tam tak karah ‘Mizo Pi Pute Nunkhua’ ziaktu Pu R.Chaldailova chungah lawm awm, a ti a. Minister chuan ‘Mizo Pi Pute Nunkhua’ chu midangte tan zirtur leh hriatbelh tur hnutchhiahna lehkhabu leh mizo hnam ze rang humhalhna kawngah pawh hnam rohlu tling a nih ngei a rin thu a sawi a. ‘Mizo Pi Pute Nunkhua’ chuan zirna in hrang hrang leh zirna sang zawk University zirlaite puitu lehkhabu tangkai tak a ni ang, tiin a sawi bawk a ni. Minister Pu Lalruatkima chuan ziakmi leh hlaphuah mite hlutna chu anmahni khawvelah an awmloh hnu pawhin, an thu leh hla vangin an dam reng a ni, tiin a sawi a. Khawvel changkangna in a ken technology vanga, thangthar ten lehkhabu chhiar an uar ta lo chu pawi a tih thu leh helam kawnga tan la turin thangtharte a sawm bawk a ni.

‘Mizo Pi Pute Nunkhua’ ziaktu Pu R.Chaldailova hi Kum 91 a upa a ni a, Ramhlun Primary School Headmaster pension a ni a. Lehkhabu pahnih Mizo Pi Pute Khawvel, Mizo Pi Pute Lenlai a lo chhuah tawh a, ‘Mizo Pi Pute Nunkhua’  a bu thumna niin, Bung 29 a then a ni a, phek 192 a ni. Rs 200 in dawr hrang hrangah leiturin a awm a ni.  Mizo Pi Pute Nunkhua-ah hian Mizo Pi leh Pute’n thihna an ngaihdan te, Mizo Puan Hming hrang hrang 46, Arsi Hming 16, Thli Hming 18, Mizo Lal te’n an khua leh tui an uap dan te, Zawlbuk leh khaw tin a an neih lemlo Vanglai Buk leh a dangte ziahlan a ni.