2419/2025-2026

Champhai, dated 27th November 2025: Vawiin khan Champhai High School Golden Jubilee lawmna kal mek ni hnihna chu Champhai North Bialtu MLA Er. H. Ginzalala chuan khuallian niin a hmanpui.

Khuallian Er. H. Ginzalala chuan Golden Jubilee an hmang thei chu an vanneih thu sawiin, Jubilee dangah chuan tuna tel te hi tel thei tawh lo tam tak an awm tawh dawn avangin chu chuan Golden Jubilee hi a tihlu zual tih a sawi. Zirlaite tan High School hi Matric pass-na leh pawl sawnna mai ni lovin an nungchang leh an suangtuahna te, an hmalam huna an nihna siamna hun a nih thu a sawi a, High School-ah hian eng ang mi nge an nih dawn tih a intan thu a sawi. Tun atanga tum neih a pawimawh tih sawiin, an tum tisang turin a fuih a, an tum ram thleng chiah lo mahse tum nei chunga lehkha an zir phawt chuan chu chuan chakna leh phurna pein, lehkha zir kawngah nasa takin chu chuan a pui thin tih a sawi a, tum nei lem lova lehkha zirte sang tak thlen an harsat thin thu a sawi. Zirna kawng an zawh hian dikna kawngah hruai lut se a duh thu sawiin, exam hall-ah entawn tum lo tur leh an thiam chin chin ah dik taka exam ngam thin turin a fuih a, dikna nunpui tlat tu Mahatma Gandhi pawh kha Hnam Pa tia koh a lo nih tak thu a sawi a, dikna tan tlat te chu a tawpah an dingchhuak thin a ni a ti.

Khuallian chuan mahni inthunun theihna a a pawimawh tih sawiin, tun atanga an zirtirtute thu ngai pawimawh turin zirlaite a chah a, mahni zirtirtute zah ngai lo zirlai mi hlawhtling an awm ngai loh thu a sawi. Thiam thei leh mi changkang tak pawh ni se zirtirtute zah ngai lote chu an tawp mai thin thu a sawi a, thian kawm kawngah pawh fimkhur a, ruihhlo leh a kaihhnawih lakah fihlim tlat tum tur leh an thian kawm te'n lo ti mahse tih ve tum ngai lo turin a chah a, heng kawng hrang hrangah hian mahni inthunun thei ni tlat turin duhsakna a hlan a ni.

He hun hi Pi Lalhlimthangi Khiangte, Headmaster-in hun a kaihruai a, Mizoram KVIB Chairman Pu C. Lalremliana'n thu a sawi bawk a, Pu Lalhlupuia, Vice Chairman Golden Jubilee Organising Committee in lawmthu sawinain hun a khar a ni. Champhai High School Golden Jubilee lawmna hi Vengthlang North VC te, Zirtirtu Pension tawh te, MHIP Vengthlang North, Champhai High School a zirlai lo ni tawh thin ten an telpui a, Eco Couture, zai, Mizo hnam lam leh intihhlimna hrang hrang a awm bawk a, Khuallian hovin Golden Jubilee ruai an kilho nghal a ni.