Vawiin khan Champhai North bialtu MLA Pu ZR Thiamsanga hovin Sawrkar Office hrang hrang hotute chuan DC Conference Hall Keifangtlangah inkawmhona an nei.

Champhai North bialtu MLA Pu ZR Thiamsanga chuan sawrkar fawng vuantu pawimawh tak takte chu ram tana hna a thawhnaah tawiawm tur leh rinawm taka thawkho puiah a sawm a. Sawrkar thar chuan hna thawh tak tak an tum thusawiin MLA te chu an chhiahhlawh leh an tirh kah mai ni tura inpe an nih thu a sawi a, hna thawk tak tak zawk tur chu Sawrkar hnathawkte an nih thu leh sawrkar hnathawkte'n an thlawp loh chuan hlawhtling takin hna an thawhtheih dawn loh thusawiin finchhuah tur leh hnathawhpui turin a sawm bawk.

Champhai North bialtu MLA chuan mi lian leh te ber thlenga kan mamawh intawm District Hospital tih changtlun te, Department tina staff dinhmun leh hnaruak awm zat te, hna kal lai mek leh ruahhmmanna kal mek la tihhlawhtlin loh te bakah Dept hmasawnna tura hmalak ngai hmasa te bakah Dept Office building nei lo leh upgrade ngai te hriat a duh thu a sawi a. Keifangtlang  Govt Complex-a siam te, Champhai leh a chhehvel Ring Road siam te leh Auditorium lian tha tak sak te, Truck Terminal leh Car park-na tur te bakah Champhai leh Aizawl inkar kawng Double lane a siam tura hmalak mek chak zawka kalpui dan tur te chu hna hmasaa nei tura hmalak a duh thu a sawi a. Clean and Healthy Champhai tih chu a thupui pawimawh ber a nih thu a sawi bawk.

He hunah hian Champhaia Department hrang hrang hotute chuan MLA hnehah hian an Department mamawh leh an harsatna tawhte bakah an hmalakna kal mek te an lo thlen a, a tul ang zela lo enzui sak a tum thu a sawi a ni.

Dr ZR Thiamsanga hian vawiin khan Champhai District Hospital a tlawh a, damdawi ina thawktute chu inkhawmhona neihpuiin an mamawh leh hnathawh kal mekte a sawipui bakah Damdawi In tihchangtlunna tur kawng hrang hrangte an sawiho nghal a. MLA hian damdawi in hmasawnna atana theihtawp chhuah a tum thu hrilh a ni.