Vawiin khan Power and Electricity (P&E) Department chuan Minister Pu R.Lalzirliana hovin an hnathawh thlir letna leh hmachhawpte ngaihtuahin ATI Auditorium-ah meeting pawimawh tak an nei.

Pu R.Lalzirliana chuan P&E Department a thawkte chu an thiam leh finna, an theihnate mipui tan an hmang takzet nia a hriat thu a sawi a. Thawktu mimal tinte chu mipui tana hnathawk tak tak an nih leh ni loh te, an hna an thawk tha em tihte inenfiah fo turin a fuih. Transformer chhiat avanga harsatna awm thin sutkian nan Power Minister chuan budget thar turah transformer a chhiat thulha hman mai theih tur stand by engemawzat ngaihtuah dan zawn ni se, a ti a, power khaihlak laia hmun dang atanga lei mai theih tur, sum deposit tur awm loh avanga lei theih loh thin sutkian nan revolving fund neih dan ngai tuah tul a tih thu a sawi. Power trading chungchang pawh sawi langin mipuiin kan mamawh loh lai, zan rei hnuah te power chuangliam hralh thin a ni a, hei hian sawrkar tan sum tam tak a hai lut a ni, a ti bawk. Pu R.Lalzirliana chuan mipui mamawh kawlphetha pechhuaktu P&E Department-ah thawktu indaihlohna avanga harsatna an tawk chung pawhin mipui tan theihtawp chhuah a, tlaivara thawh a ngaih chang pawha thawk thin tam tak an awm chu ropui a tih thu a sawi a, thahnemngaihna leh inpumpekna nen hna thawk zel turin a fuih a ni.

Programme kaihhruaitu P&E Secretary Pu Lalengmawia pawhin mipui nena inngheng renga thawk P&E Department chu ram hmasawnna tak tak khawihtu an ni, a ti a. Mipui tana thian tha niin, mipui hne hnai lehzuala thawh pawimawh a tih thu leh mipuiten an hnathawh an hriat zel tul a tih thu a sawi bawk.

P&E Engineer-in-Chief Pu Lalramliana tarlan danin tun dinhmunah Mizoramah Small Hydro Power (SHP) Generating Station - 11 (installed capacity -29.35 MW) a awm a. Project thar zawh hnaih tawh pahnih - Tlawva SHP (5MW) leh Kawlbem SHP (4MW) awmin thawh zawh tawh commission mai tur - Tuiching SHP 100KW leh Tuiriza 100 KW te a awm. Solar Power Project hmalak mek - Vankal Solar park (20MW) leh Tlungvel Solar Park (2MW) awmin heng bakah hian NEEPCO siam Tuirial HEP (60MW) atangin Mizoramin kawlphetha a dawng mek bawk a ni.

P&E Department review meeting-ah hian Mizoram puma P&E Officer AE/SDO chin chunglam te an kalkhawm a. CE (RE) Pu C.Lianlunga, SE (SLDC) Pu Lalbiaksanga, Deputy Director Pi Lalnunmawii Ralte leh SE (Commercial) Pu Lalrinmawia ten  power point presentation neiin an  an hmang a ni.