District Transport Office, Lunglei chuan Mizoram Sawrkar leh mipuite tan hna tluang taka thawk zelin Sawrkar kum kal mek (2018 - 2019) chhung hian Sawrkar ah pawisa thahnem tham tak an chhung lut mek.

Vehicle Registration, License Fee leh a kaihhnawih ah tun Sawrkar kum kal mek, December 2018 thleng in Rs 2,41,18,194.00 revenue hmuh a ni tawh a. Sawrkar kum tawp (March thla tawp) ah chuan Rs 3,76,19,956 a nih beisei a ni. Motor register thar, December 2018 thleng in 1379 a awm a. Sawrkar kum tawp ah chuan motor register thar 2002 awm hman tura beisei a ni bawk.

Tun dinhmun ah Mizoram State Transport (MST) Bus Aizawl - Lunglei service lai 4 a awm mek a. Passenger ticket man atanga Sawrkar pawisa DTO, Lunglei a chhun luh tawh zawng zawng hi Rs 17,77,164/- a ni a. Sawrkar kum tawp ah chuan Rs 23,13,672/- chhun luh hman beisei a ni bawk. December 2018 thlengin passengers zawng zawng 11,622 an awm a, heng zing atang hian Cancer vei 21, mitdel 3, rualbanlohna dang nei 4 leh kum upat avanga ngaihhnatthiam (Old age concession) dawng mi 235 an awm bawk. Lunglei khawpui chhung a vehicle parking fee khawn atangin thla tin Rs 34,100/- Sawrkar ah chhun luh thin a ni.

District Transport Office, Lunglei hi kum 1986 khan Pu C.Lalchhuana hova bul tan a ni a. Tun dinhmun ah thawktu mi 45 awm in DTO Pu Vanlaltanpuia'n a ho mek a ni.