Vawiin chawhnu dar 1:00 khan Champhai North Bialtu MLA Pu TT.Zothansanga chuan Kahrawt venga Upa Chalchungnunga building chhawng chung bera District Fisheries Office chu a hawng.
Office thar hawnna inkhawm Kahrawt YMA Hall-a neih Pu T. Sangkunga, Secretary, Fisheries Department kaihhruai-ah hian thu sawiin Pu TT Zothansanga, MLA chuan District Fisheries Office thar hawn a ni ta chu Champhai tana hmasawnna lawmawm tak a nih thu sawiin Champhai chu District Headquarters-a puan a nih hnu kum 10 vel zet hnuah hetiang office hawn a ni thei ta chu a lawmawm hle tih a sawi a. Khawvela kan awm chhung hian mitin hian eng nge kan tih a kan thawh tih hi min thlirin kan thawh atangin history kan siam thin a. Chuvangin kan hnathawh leh kan thil tih hi min ten min thlir thin avangin kan fimkhur a tul a ni a ti a. Tuna hawn thar tak District Fisheries Office pawh hi Champhai tana hmasawnna chikhat niin an hnathawh turah mipui tawiawmna nen tha taka a kal chhoh zel a beisei tih a sawi a. NLUP sem chhuah takah pawh Fisheries Department kaltlangin Champhai District chhungah chhungkaw 147 ten NLUP an dawng tih a tarlang a. Champhai tana sorkarin hmasawnna hna a thawh thenkhat tarlangin Govt. Champhai College tih changtlunna turin Rs. vaibelchhe 9.5 chu dawn tura tih fel tawh niin, a thawh khatna atan Rs. vaibelchhe 3.4 chu sanction a ni tawh a. Keilungliah khuahna tur atan Rs. vaibelchhe 47 chu tunah hian buaipui mek a ni a, Keifangtlanga 132 KV Sub-Station bunna tur Rs. Vaibelhhe 23 pawh tihfel mek a ni bawk a ni a ti bawk.

He huna thusawitu dang Champhai District Bawrhsap Pu Vijay Kumar Bidhuri chuan Mizoram chu Agriculture lama dehchhuah kan nei tha tawk lo tih sawiin Sangha lamah pawh kan mamawh tawk pawh kan la thar chhuak lo va, intodelh tura hmalak a la tul hle a ni a ti a. Sangha chu taksa tana tha a ni a, sangha khawina hmun tur pawh Chmphai chuan a neih that thu sawiin, kan leilet te hi buh chin nan leh sangha khawi nana hman kawp theih a niin tuna District Fisheries Office hawn a nih takah chuan Champhai leilet zawl pawh hi a chunglam Buhchangrum leh a hnuai lam Sangha awmna hmun atan hun reilote-ah la chantir theih a beiseiawm a ni a ti.

Inkhawm kaihruaitu Pu T. Sangkunga chuan sorkar hnathawk kalkhawmte fuihna thu sawiin sorkar hnathawkte chuan kan puten hmasawnna kawnga hma an lak theihna tura kawhhmuhtu leh hmasawnna hna an thawh theih nana tanpuitu ni thei tura inbuatsam a tul hle tih a sawi a. Taima leh tih tak zeta thawktu chuan hlawhtlinna a hmu thin angin ram hmasawnna kawnga kan theih ang tawk thawh hi kan tih tur a ni a ti.

Dr. OP Singh, Director, Fisheries Department chuan report pe in, an department record danin Champhai bialah chhungkaw 900 ten ram hectares 251 huam chhungah sangha an khawi mek a, metric ton 2003 thar chhuak thei tura beisei an ni a ti a. Pu Dotawna, Jt. Director, Fisheries Deptt. chuan lawmthu sawiin inkhawm hi a tin a ni.