Vawiin chawhma khan Rural Development Minister Pu R.Lalzirliana chuan North Vanlaiphai khawchhunga Sawrkar hmun pawimawh thenkhatte  a tlawh

Minister chuan a hmasa berin kum 1913 a din tawh khum 10 awmna North Vanlaiphai Hospital a tlawh a, thawktuten lo dawngsawngin damdawiin leh a vel chipchiar takin a fang a, damlo admit lai te pawh tlawhin a kan vek a ni. He hospital ah hian Doctor pakhat leh nurse pali an awm a, thawktute hian damdawiin hmasawnna tur atana pawimawh ni a an hriat te Minister hnenah sawiin Minister chuan uluk takin a ngaihthlak sak a ni.

Hemi hnu hian Minister chuan Tourist Lodge sak lai mek, chu tlawhin uluk takin a en chhuak vek a, a enkawltute bakah khawtlang hruaituten harsatna an tawh te lo hrilhin sak zawh mumal loh a awm chu tha an tih loh thu leh, tha taka sak zawh thuai thuai an nghahhlelh thu an sawi a, Minister pawhin hna uluk tawk loh avanga sum tam tak sen ral ani thin chu pawi a tih thu sawiin, Tourism Department hotute lo sawipui ngei a tum thu a hrilh a ni.

Tourist Lodge a tlawh hnu hian Minister chuan North Vanlaiphai Forest Rest House a tlawh leh a, a enkawltute chuan harsatna an tawh hrang hrang Minister hi lo hrilh ve lehin tun dinhmunah phei chuan VIP Room tih loh chu riahna tlak anih loh thu te, a chung a far nasat thute an lo hrilh a, Minister chuan a lo ngaihven zui tur thuin a chhang bawk.

Minister hian North Vanlaiphaia KVK hmun pawh tlawh nghalin an hmalakna hrang hrangte a hmunah a en pui a, KVK hnathawh chu tha a tih thu leh thawktute inpekna chu fakawm atih thu sawiin, kuthnathawktuten hma an sawn zel theih nan a thawktute chu an thiamnate chher hriam belh zel turin a chah a, kuthnathawktute hman tur atana siam khawl hrang hrangte pawh enin a hman dan tur te KVK hnathawkte hian a takin an entir nghal bawk. KVK ah hian Programme Coordinator Lalnunpuii Parte hovin, thawktu chi hrang hrang - Subject-matter Specialist-5, Programme Assistant-3, Stenographer-1, Accountant-1, Driver-2, Supporting Staff-1 awmin an vaiin thawktu 15 an awm mek a, an ni hian kuthnathawktute hnenah tunlai khawvel thiamna hmanga hlawk zawk a thlai thar theih dan leh, awlsam zawk dan chi hrang hrang zirtirna an pe reng a ni. 

 Minister hian Aizawl pana a haw pahin vawiin chawhnu khan Khawlailunga RMSA building sak lai mek chu a tlawh nghal a, contractor hnathawh dan chu fak tlak a tih thu leh midangte tan pawha entawn tlak ni a a hriat thu sawiin khawtlang aiawh lo awm te hnenah chuan khawtlang hmasawnna hna thawh reng reng politics a inchirhtheh na remchang atana hmang lo turin a chah a, khawtlang hmasawnna hna thawktuten dik tak leh phur taka hna an thawh theihnan  kawng lo siam sak thin a tul  thu sawiin a hlawkna tel tu turte chu khawtlang mi leh sa vek an nih avangin tumahin a politics zawngin thil la lo se a duh thu a sawi a ni.

Minister hi Pu Lalrinmawia Ralte, Parliamentary Secretary, Pu Sangdingliana, Project Director, DRDA Serchhip District leh sawrkarv mipawimawh thahnemtakin an tawiawm a ni.