Home Minister Pu R.Lalzirliana chuan tukin dar 8:30 khan North Vanlaiphai Police Station a tlawh a, North Vanlaiphaia sawrkar hnathawkte leh khawtlang aiawh pawl hrang hrang hruaituten lo hmuakin Police Station kawtah amah lawmna inkhawm neih a ni.

Home Minister chuan amah lawm tura kalkhawm te hma ah thusawiin North Vanlaiphaia sawrkar hnathawk te inlungrual tlanna a hmu chu lawmawm a tih thu a sawi a, an hun chhung hian Sawrkar hnathawkte nen inlaichinna tha tak neia zoram hmasawnna hna a tam thei ang ber thawh chu an duhthusam ber a nih thu a sawi bawk, UD&PA kaltlangin North Vanlaiphai hmasawnna tur hna tam tak thawh thuai anih dawn thu mipui kalkhawmte chu a hrilh bawk a ni.

Home Minister chuan police te chu khawtlang muan tu leh mipuite pawhin rintlak leh innghahna tlaka an ngaih theih tura an awm reng a pawimawh tih sawiin mipuite pawh police te tawiawma thawhpui thiam turin a chah a, police ten engemaw tisual palh leh rahpelh palh an neih chang a awm a nasa taka sawisel nghal mai lova, dawhthei taka fuih leh thil dik leh tha zawk kawhhmuh thin turin a ngen a, police te hian mipuite thlawpna leh tanpuina an mamawh avangin an tihsual lai chauh hriat sak lo turin mipuite chu a chah a ni. Home Minister chuan Sawrkar kalsualna laka venpuitu pawl hrang hrang PRISM, SOSA etc te pawh lawmthu hrilhin mipui rawngbawlna kawnga an thahnemgaihna chuan sawrkar pawh a fimkhur tirin inthlahdahna lakah thui takin a veng a ni tih a sawi bawk.

Home Minister chuan North Vanlaiphai Police Station chu upa tawh tak anih thu leh sawrkarin chei that a tum mek thu sawiin kum 2012-2013 chhunga sak that leh tura ruahmanna (work proposal) siam mek anih thu leh,hei hian Police Station mai bakah police quarters thar engemaw zat a huam tel dawn tih thu a sawiNorth Vanlaiphai Police Station hi chipchiar taka fangin an harsatna tawh te uluk takin a ngaihthlaksak bawk a ni.

North Vanlaiphai Police Station ah hian O/C T.Lalthanmawia hovin, 2nd O/C pakhat, Head Constable pakhat, Constable 10, 4th Grade pakhat leh Driver pakhat nen an vain thawktu mi 15 an awm mek a, Lock up mipa dahna pakhat leh hmeichhe dahna pakhat ve ve a awm bawk a ni.

Home Minister hi Pu Lalrinmawia Ralte, Parliamentary Secretary, Pu Sangdingliana, Project Director, DRDA Serchhip District leh official thahnem takin an tawiawm a ni.