Champhai SP leh a thawhpuiten Champhai khawchhung mipuite him theih zawkna atan hmalakna thar a duan Tanpuitu chu vawiin khan a tlangzarhna hun khuallian Champhai DC Pu H. Lalengmawia hovin neih a ni. Hun kaihruaitu Champhai SP Pu RP Meena chuan Tanpuitu scheme hnuaiah hian Champhai khawchhung chu darkar 24 chhung motorcycle-in a vil reng tur thu leh a bika Mobile phone number siamah tanpuina mamawh chuan a biak pawp reng thei dawn tih a sawi.

Champhai DC Pu H. Lalengmawia chuan Champhai Police-te hmalakna chu fakawm a tih thu sawiin, a hranpa a he patrolling hna thawk tur mi lak belh awm chuang hauh lova mipuite thatna leh himna tur scheme siam a ni chu entawntlak a tih thu a sawi a. Sorkar hnathawk zingah tih chhiat leh tih that bik pawh nei hran lova thawk ve mawp mawp an awm laiin pawisa leh thawktu indaihlo karah thil tha engemaw thawh tlat tuma hmalakna thar siam thinte chu ram hmangaihtu an nih thu a sawi a ni.

DC chuan Champhai District chhunga dan bawhchhiatna hrang hrang report a tam thin thu sawiin, sual do hi police kutah chauh kan dah tur a nih loh thu tarlangin, Kohhran leh NGO-te chu sualna kawng laka mipuite khalhngiltu an nih thu a sawi a. Vawiina scheme tlangzarh Tanpuitu pawh hi a hlawhtlinna tur chu mipuite nen tanrualna anih thu sawiin DC Pu H. Lalengmawia chuan 'crime detection-a' police-te puih kan phur ang hian court-ah witness a inlan te hi hrehlo in, dikna a lal theihna chuan en liam mai mai lova huaisen kan chhuah a ngai a ni, a ti.

Khuallian chuan he hunah hian Tanpuitu tih hming phuahtu SI Lalsangliana Sailo hnenah leh he scheme hlawhtlinna tura Mobile Handset pe tu Pu T. Thanga, Mobile House neitu hnenah chawimawina thuziak a hlan a. Patrol Duty turte hnenah handset leh raincoat bakah silai a hlan bawk a ni.

Vawiin programme-ah hian Pi H. Vanlalzawni, Dy.SP (Hqrs) Champhai chuan lawmna thu sawiin, Addl. SP Pu VL Lura Hauzel atangin Tanpuina Scheme tobul leh hrilhfiahna tlangpui ngaihthlak a ni a. Sub-Hqrs YMA, MUP leh MHIP President theu ten thu an sawi a. SDPO Pu Lalringliana Pachuau chuan lawmthu sawiin hun a khar a. He hunah hian Champhaia Sorkar office hotute leh tlawmngai pawl hrang hrang hruaitute bakah media mite an tel a ni.

Addl. SP Pu VL Lura Hauzel chuan Tanpuitu scheme chu mipuite rawng tha zawk leh felfai zawka Champhai policeten an bawl theihnan SP Pu RP Meena remruatna hnuaiah duah chhuah a nih thu sawiin, hemi hnuaiah hian Motorcycle siren leh beacon light vuah hmangin Police pahnih silai keng leh keng loin chhun zan zawmin khawchhung patrolling an neih tur thu te, Champhai khawchhunga sualna thleng report awm reng reng chu harsatna dang a awm loh chuan minute 15 chhunga thlen hman vek tum a nih thu a tarlang a.

Phone call pangngai bakah Whatsapp message hmang leh Facebook group TANPUITU, Champhai District Police-ah report hi a siam theih bawk dawn a. Amaherhawchu Whatsapp leh Facebook-a report-te hi CrPC Dan hnuaiah chuan FIR a tlin loh avangin case puitling kalpui anih dawn chuan Champhai Police Station-ah ziak ngeia report thehluh a tul thu sawi a ni.

TANPUITU biak pawhna number chu 7085644019 a ni.