Vawiin chawhma khan Champhai Vengsang YMA Hall-ah Champhai Police leh 10th Assam Rifle tangkawp buatsaihin Indian Army chungchang leh sipai lak dan kalphung tharah training neih a ni.

He hunah hian Champhai SP Pu RP Meena chuan Indian Army hi Mizo thalaite rilrem zawng tak, puitling mai nilo, naupang tete thlenga kan ngaihsan a nih thu sawiin, vawiina zirlai lokal te chu he training hmang tangkaia Indian Army a lut ve thei ngei tura tan la turin a fuih a. Zirlai ten hre chiang tura an pen chhuah ngai lova Army Officer zawk ten zirlai naupangte kokhawma training tha tak an nei thei chu lawmawm a tih thu a sawi bawk.

He hun hi Pu Lalringliana, SDPO Champhai chuan kaihruaiin, Major KB Singh, 10th AR, Champhai hnen atangin Army nih theihna tur kawnga thil tangkaite leh Army inrelbawl dan zirlaite chuan an ngaithla bawk.

Vawiin training-ah hian zirlai kalkhawmte atangin zawhna leh chhanna hun hman a ni a. Pu HP Vanlalchaka, OC Champhai Police chuan lawmthu sawiin he hun hi a khar a ni.

Champhai Higher Secondary School leh GMHSS naupang 400 chuangin vawiin training hun hi an chhim a. Programme a zawh hnu hian Champhai Police station kawtah Assam Rifles-te hian an silai neih thatte a duh duh entheih turin an phochhuak bawk a ni.