Vawiin atang hian Lai Autonomous District Council inthlanna a Polling Party a duty turte tan Lawngtlai DC Conference Hall ah vote thlak tan a ni a, naktuk ah pawh an thlak chhunzawm leh ang.

Tun thla ni 26 a LADC General Election vawi 10 na inthlan lo awm tur atana inbuatsaihna chu tluang taka kalpui chhoh zel a ni a, vawiin leh naktuk hian he inthlanna a duty a chhuak tur official te tan vote thlak theihna hun hawn sak an ni. DC Conference hall ah dawhkan pathum buatsaihin vote thlak tir an ni a, he thu ziahlai hian vote tla zat mumal taka hriat theih a la ni rih lo a ni.

Vawiin vek hian vote thlakna tur hmanrawn pawimawh te thliar fela buatsaihna hna thawh a ni bawk a, Chawngte ah duty turte tana training buatsaih a ni bawk. Nimin lam khan Electronic Voting Machine First Level Checking neih a ni a, naktuk lamah Randomisation neih chhunzawm tur leh Polling Parties te training buatsaih tura ruahmanna siam a ni.

Inthlanna fel fai taka buatsaih a nih theih nan Lawngtlai District Election Office chu a inbuatsaih mek zel a, inthlanna thianghlim tak a awm theih nana thawktu officials te pawhin an bial chhung te an tlawh kual reng bawk a ni.