Ministry of Social Justice hnuaia National Institute of Social Defence (NISD) bultuma  ni  thum chhung awh tur, Champhai District chhunga Police-te Damdawi hman khawloh laka inven dan tur zirtirna hun chu vawiin khan SDPO Conference Hall, Champhai Vengsangah neih tan a ni a. Hawnna hun hi Pi Lalrochami Ralte, Chief Judicial Magistrate, Champhai chuan khuallian niin a hmanpui a ni.

Khuallian Pi Lalrochami Ralte, CJM Champhai chuan dan leh thupek kenkawh leh ram venhim kawnga Champhai Police-te thahnemngaihna chu fakin, Aizawl District tih loha Case tamna ber ni chunga tlin taka hna an thawk thin chu fakawm a tih thu a sawi a. Damdawi hman khawlohna hluar zel chuan chhungkua leh khawtlang  mai duh tawk lova, venhim hna thawktu Police-te ngei pawh a kan kai tak zel avangin hemi kawnga inzirtirna  buatsaih ani thei chu lawmawm a ti a. Damdawi leh a kaihhnawih hman sual chuan rukruk leh tualthahna a tipung a, hemi dolet tur hian  khawtlang ang pawha tanrual a hun tawh takzet a ni, a ti a. CJM chuan India ramah Mizoram chu NDPS Case hmanga hremna lekkawh tha ber zinga mi anih thu sawiin, NDPS Case za zela 91 chu hremna pek an nih thu tarlangin, Police, Excise, NGO, Mipui leh Court-te inkara thawhhona tha awm vang chauh a ni a,  hemi kawnga thawhhona tha tak awm mek chu chhunzawm zel nise a duhawm ngawt ang, a ti a. National Crime  Bureau Report, 2013 atanga neihah Conviction rate sang ber kan ni leh zelte chuan dan leh thupek kengkawhtute inpekna leh mawhphurhna hlenzia a tarlang a, hemi kawngah hian tha taka thawhho zel pawh a tul a ni, a ti bawk.  Dan leh thupek kengkawhtute tan damdawi leh ruihhlo dang khawih a thiang lo a ni tiin, Police-te chu heng laka inthiarfihlim hram hram turin a fuih a. Training hun tha leh hlawkpuiawm tak hmanga mahni mawhphurhna hlen theuh tura sawmin duhsakna a hlan a ni.

He hun kaihruaitu Course Co-ordinator Pu Francis Lalnuntluanga Ralte, Addl SP Champhai chuan training kaltlangin  drugs leh ruihhlo dang, thalaite suata kan ram leh hnam run mektu hi engtinnge kan  lo beih ang a, Kohhran, chhungkua leh khawtlanga bu khuar tlat hi engtinnge kan nuaibo theih ang tihte zir a ni dawn a ni,  ti a. Addl SP chuan ruihhlo leh a kaihhnawih lakah  Police ngei pawh an  fihlim bik loh avangin hemi kawnga zirtirna leh infuihtharna hun buatsaih chu thil tih makmawh tak anih thu a sawi a.  Mizoram kaltlanga ruihhlo tam tak tawlh zinga tam ber chu Champhai District kaltlanga   lo lut anih ngei pawh a rinawm thu sawiin,  a ven kawngah Champhai Police ten ngawrh taka an beih thu a sawi a. Champhai District chhungah Police 163 an awm mek thu sawiin,  Champhai Police Station chu India ram puma titha teha 19 na leh Norh East bika pakhatna a ni thei chu a  chhuanawm hle a ni, a ti a.  Kumin kumtir atanga vawiin ni thlengin Heroin  Kg 1.926,  Rs. 69,56,800 hu; Ganja  Kg 108.43, Rs. 5,48,000 hu; Methaphetamine  Kg 29.228, Rs. 3,90,00,000 hu leh Pseudoephedrine Kg 335,  Rs. 5,14,56,000 hu zet chu man a ni tawh a ni, a ti a. Training pe turte leh training a tel turte hun hlawhthlak tak an neih theih nan duhsakna a hlan a ni.

Training hi Police 40 ten an nei  a, sawm bik mithiam  Dr J.Lalramchhuanga, MD Senior Specialist; Pu Zoremthara Ralte, SDO Sadar; Pu C.Lalremsanga, Senior Civil Judge; Pu VL Chama Hnamte, Chairman,  Child Welfare Committee leh Bro Anthony Para, Principal Holy Cross School-ten zirtirna an pe thin dawn a. Vawiin training hawnna hun hi Pu Lalengliana, DSP Champhai chuan lawmthu sawiin a khar a ni.