Vawiin chawhma khan Champhai Town Sanitation Task Force chu an Chairman Dr Naveen Aggarwal, IAS hovin an thukhawm. He hunah hian Champhai khawpui chhung cheimawina leh faina lama hmalakna tur hmachhawp hrang hrangte thlirho a ni.  

Champhai Bawrhsap Dr. Naveen Aggarwal chuan Champhai khawpui cheimawina tura rawtna awmte chu phurawm a tih thu leh a bik takin UD&PA Department leh Champhai Nature Conservancy (CNC) te hmalakna te chu fakawm a tiin, lungrual taka thawk tlang zel turin duhsakna a hlan a. Thingphun belh lama tan lak a pawimawh thu leh Circuit House bula Tlaizawng hmun siam tumna chu tha  a tih thu a sawi a. Champhai Nature Conservancy chu Champhai khawpui mai bakah District chhunga khaw dangahte chu School Eco-Club-te bengvara thawhpui turin a chah a ni.

Meeting chuan Lui dung tihfaia hnatlang leh tha a ti a, Champhai khawpui bik tan Khawpui hrula luang Keilungliah lui dung tihfai a hnatlang neih nise tiin, hemi atan hian NSS College leh Higher Secondary School zirlaite thawhpui nise tih a ni a. Khawzawl Town bikah chuan BDO/SDO (C) kaihhhruaina hnuaiah buatsaih nise, Biate leh Khawhaiah te VC kaihhruaina hnuaia huaihawt nise tih a ni bawk a ni. Urban Cleanliness Compettition buatsaih tura rel ni bawkin hemi atan hian VC te kohkhawma rawtna siam nise, sawrkar Office leh Zirna Inah te pawh hriattirna pek vek nise tih a ni a. Faina lama inzirtirna Wall Painting te pawh Champhai, Khawzawl, Khawhai leh Biateahte thlan bik hmunah siam nise ti a rawt a ni bawk a. A zau thei ang bera Faina kawnga inzirtirna kalpuina turin Capacity Building Awareness Campaign and Education, Swachh Bharat Mission official partner Govt. Champhai College nena kalpui dan tur te, Media hmanga puanzarna neih dan te leh Generic Banner siam dan turte pawh sawiho a ni bawk.

Vantlang hman theih tur Hnawmbawm lian dah dan turte pawh sawiho a ni a. Kumin bikah Community Bins 230 semchhuah tum a ni a, Champhaiah 200, Khawzawlah 70, Khawhaiah 30 leh Biate ah 30 te pekchhuah tura ruahman a ni a. Champhai Nature Conservancy (CNC) leh UD&PA tangkawp hmachhawp Champhai khawpui leh chhehvel cheimawi dan tur ruahmanna te thlir ho niin, hemi chungchang sawizauna hi CNC hruaitute’n an nei a. Ruahman dan chuan Champhai khawpui hmun laili leh remchang laiahte Street Trees and Side walk Garden, Green Retaining Wall, Green Railings, Lamp Post Garden, Small Park Area siam leh remchan dan anga Chhawkhlei, Chawmzil, Rihnim, Zaihri, Tlaizawng, Ashoka Tree phun tur chungchangte pawi sawilan a   ni. Heng bakah hian Tlaizawng hmun siamna tur Project Tlaizawng chu meeting-ah hian sawiho a ni bawk. Meeing chuan hnathawhte thlirletna hun Review Meeting pawh neih leh zel nise tiin a rel bawk a ni.