Vawiin chawhma khan Mizoram Police hnuaia CID (Crime) chuan Ni thum (3) awh tur Cyber Crime Awareness Programme chu Mizoram Sub-ordinate Police Officer-te tan SP Aizawl Conference Hall-ah a buatsaih a, Pu LH. Shanliana, IPS, IGP (Intelligence and Law & Order) chu khuallian niin he Program hawnna hi a hmanpui.
Pu LH. Shanliana chuan a vawi hnihna atan a he Cyber Crime Awareness Programme changtlungtak Mizoram Police te tana buatsaih a ni chu lawmawm a tih thu sawiin, “Tunlai thiamna sang zel ina a ken tel ‘Cyber Crime’ hmachhawn tura dan kengkawhtute puala programme buatsaih a ni hi cyber criminals ho chhuichhuahna atan thil tangkai tak a ni,” a ti. Pu LH Shanliana chuan Mizoram a Cyber crime pun chhoh chak zia leh ala pun chhoh zel theih dan kawng hrang hrang te tarlangin, “Police te hian kan khawl neih tha tak takte leh Technology thar hrang hrangte hi kan hmelhriat a, kan zir chian a, anihna tur ang taka kan hman chhuah theihna turin thiamna kan neih a tul a, misualten Cyber crime an kalpui dante zirchiangin, beihlet dan tur kawng kan hriat hi a pawimawh hle a ni,” a ti.
Pu LH Shanliana chuan Kum 2014 khan CID (Crime) hnuiah Cyber Cell din anih thu leh Cyber Police Station-a upgrade turin sawrkar in hma a lak mek thu sawiin ,”Tunah hian Sorkar laipui atangin Cyber Crime Prevention against Women and Children (CCPWC) hnuaiah Rs. 148 lakhs hmuh tawh a ni a, hei hi Cyber Forensic Laboratory leh Cyber Training Centre changtlung tak dinna tur a ni”, a ti a “Sawrkar in chak takin hma la mekin kumin chhung ngei hian Cyber Forensic Laboratory leh Cyber Training Centre te hi din ngei tum a ni” a ti bawk. Sub-ordinate Police Officer te chu hlawhtling taka he training hi zo a, thiamna thar nen an hnathawhna hmun theuhah tangkai taka Cyber crime awareness program hi hmang turin duhsakna a hlan bawk a ni.
Pu Zosangliana SP CID(Crime) in Awareness Programme hawnna inkhawm hi a kaihruai a, Pu F. Lalthlamuana, DySP CID(Crime), Course Coordinator ni bawk chuan programme kalphung tlangpui sawina hun neiin,” Mizoram Police ten Cyber Crime bikah chona tam tak kan hmachhawn avangin, he Awareness Program hian Mizoram Police te nasa takin min puih ngei ka beisei,” a ti. Pu Stephen Lalrinawma, Additional SP, CID (Crime) chuan lawmthu sawina hun hmangin Cyber Crime Awareness hawnna Programme a ti tawp a ni.
He programme hi sorkar laipui scheme ‘Cyber Crime Prevention against Women and Children’ hnuaia hmalakna chi khat niin, Cyber Forensic Laboratory leh Cyber Programme Centre te din turin chak takin hmalak mek a ni a. Cyber Forensic Lab leh Cyber Programme Centre te hi din fel anih veleh Cyber Crime Investigation Programme ngawrh zawka kalpui tura ruahmanna siam a ni bawk a ni.
He Cyber Crime Awareness Programme ah hian SBI, ICT, Social welfare department leh CID (Crime) staff a mithiam ten zirtirna an pe dawn a, district hrang hrang atangin Sub-ordinate Police Officer-te lo telin, Police Inspector pahnih (2), SI sawm pahnih (12) leh ASI sawm pahnih (12), an vaiin Police Officer sawmhnih leh paruk (26) an tel a ni.
