No.5282/2020-2021

Dated Champhai, the 21st September,2020: Vawiin khan Champhai Bawrhsap Pi Maria C.T Zuali kaihhruaina hnuaiah Champhai khawpui thianghlim leh fai siam kawnga hmalakna tur pawimawh tak Champhai Solid Waste Management Bye-Law, 2020 duan chungchang relin I&PR Conference Hall, CHANEM-ah thutkhawm a ni. He dan hnuaia siamthat ngaite siam that niin pawm a ni a, hman theih tura hriattirna chhuah anih hnuah a taka hman tan ani ang.

Pi Maria C.T Zuali chuan faina kawnga Champhai district hmalak tawhnate tarlangin, Champhai district chu district zinga khawlaia inthiar awmlohna Open Defecation Free (ODF) hmasa ber anih thu leh faina kawngah lawmman a lo dawn nual tawh thu a sawi a. Bawlhhlawh paih fimkhur angaih thu sawiin, tawih thei leh theilo thliar thiam angai a, faina kawnga tanla chhunzawm zel chungin khualzinte hip thei turin faina kan nunpui angai ani, a ti a. Green India Mission kaltlangin boruak hrisel leh thianghlim siam kawnga hmalak anih thu pawh a tarlang a. Dan siam thar chu a taka hman theih mai tura hriattirna chhuah vat anih tur thu pawh sawiin, mipuite hnenah a zau thei ang bera hrilhhriat an ni ang, a ti bawk. Bawrhsap chuan nitin khawsaknaah faina nunpui angaih thu sawiin, a tirah harsa rih mahse tumna a awm phawt chuan tihlawhtlin theih a beisei thu a sawi a. Sawrkar atanga hmalakna ngaihchan hmasak kher ngai lovin mahni theuhah bul kan tan thei ani tiin, mimal atanga intan, khawtlang leh ram pum thlenga faina nunpuia midangte zirtirtu nih tum theuh turin district mipuite a chah nghal a ni.

Meeting-ah hian a taka Champhai Solid Waste Management Bye-Law, 2020 hmanga faina kawnga hmalaknate chak zawka kalpui anih theihna turin inrawnkhawmna leh sawihona neih a ni a. Faina kawnga mipuite mawhphurhna leh zawm tur hrang hrang duante enho niin, chhungtinte atanga bawlhhlawh bakah eizawnna hmun hrang hrang leh hmunhma dangte atanga bawlhhlawh khawnkhawm, paih leh sawngbawl kawnga man chawi ngai turte sawiho a bithliah nghal a ni a. Khawlaia bawlhhlawh paih, faina leh hriselna kawnga dan siam zawm lotute hrem theihna tur hrang hrangte pawh enhoa chawi tur ngai zatte bithliah fel a ni bawk.

He dan Municipal Solid Waste Rules 2016 zulzuia duan hmang hian Champhai khawpui a lo thianghlim zawkna turin bawlhhlawh sakhat dahkhawm, lakkhawm, sawngbawl, siam danglam leh tihral kawngah theihtawp chhuaha hmalak tum a ni.