No.2408/2021-2022

Aizawl the 30th September, 2021: Fire Service Week, April ni 14 -20, 2021 chhunga hman puala High School Zirlaite tana Essay inziahsiak Mizoram puma lawmman pahnihna dawngtu C. Lalruatzuali D/o C.Lalmuansanga, Bethel veng, Class-IX, BC Lalthlamuana English Academy School lawmpuina leh lawmman hlanna hun chu vawiin chawhnu dar 12:30 khan Champhai Fire Station buatsaihin Recreation Hall, Fire Station Champhaiah neih a ni a. He hun hi Pu Lalrinpuia Varte, SP Champhai chuan khuallian ni a telpuiin lawmpuina thuziak cheimawi leh pawisafai Rs 2,000/- chu C. Lalruatzuali hnenah a hlan a ni.

Khuallian Champhai SP Pu Lalrinpuia Varte chuan Fire Service Week puala essay inziahsiak Mizoram puma pahnihna ni thei zirlai Champhaiin a nei chu lawmawm tiin, thinlung takin zirlai, zirtirtute leh a nu leh pate a lawmpui thu a sawi a. Ziakfungin thil a tih theih thu leh tharum aia nghawng nasa zawk a neih thu sawiin, nakin thlenga ram leh hnam tana tangkai leh thawhhlawk tak ni tura theihtawp chhuah chhunzawm zel turin a fuih a. Ram leh hnam siamthat kawngah ziakmite an pawimawh zia leh mipui zirtir kawnga an tangkai thin zia thu sawiin, thuziah kawngah tun aia kan thanharh deuh deuh a ngai a ni, a ti bawk.

He hun kaihruaitu Pu F. Lalchhandama, Station Officer, Champhai Fire Station chuan hripui leng leh inkharkhip avangin Fire Service Week puala essay inziahsiak lawmman sem tihkhawtlai a nih thu leh, remchan dan angin a dawngtu turte awmna khuaah semna hun buatsaih a nih thu a sawi a. April 2020 atanga March 2021 chhungin Champhai District-ah In kang tum 3 a thlen thu sawiin, hemi avang hian nunna chan an awm loh thu leh cheng nuai 17 chuang hu bungrua a kanral thu a sawi bawk.

Fire Service Week 2021 puala essay inziahsiak lawmman hlanna hunah hian DIPRO, District Librarian, BC Lalthlamuana English Academy School thawktute, Zirlai chhungte leh Champhai Fire Station thawktute an tel a ni.