No.2410/2021-2022

Aizawl, 30th September, 2021 : Health & family Welfare Department, Govt. of Mizoram chuan Mizoram Health Systems Strengthening Project (MHSSP) chungchang mipuiten an hriatchian theih nan a hnuaia thuchhuah hi an siam.

Mizoram Health Systems Strengthening Project (MHSSP), Mizoram sawrkarin a kalpui mek hi Mizoram mipuite hriselna a lo that zawk theih nana thawh a ni a. He project hi World Bank atanga loan (US $ 32 million) hmanga thawh a nih avangin kawng engkimah an dan leh hrai (regulations) kan zawm a ngai a. Loan rulhna 90% (za a sawmkua) hi Department of Economic Affairs (DEA), Ministry of Finance, Government of India in min tum sak dawn avangin DEA in tihmakmawh (conditions) a siamte kan zawm kim a ngai bawk a ni.

Tunhnaia Social Media a hnam dang Consultancy Project min thawhpui tura kan rawih chungchanga thu leng velah Mizoram mipuiten thu dik an hriat theih nan he press release hi siam a nih bakah World Bank hian an project reng rengah project in a nghawng turte (stakeholders) a ngaih pawimawh avangin, inhrilhhriatna hun remchang tak a ni bawk.

Health & Family Welfare Department in a kalpui mek MHSSP hi project pawimawh tak a ni a. Mizoram mipuite hriselna a lo that chhoh zel theih nan kawng hrang hranga kan health system hi siamthat tum a ni a. Kan tum hi kan thlen theih nan min thawhpui tur leh technical support (thiamna bik) min pe turin consultancy te rawih a ngai a. Hei hi World Bank leh DEA, Ministry of Finance te dan ang a nih avangin project hi a thawhna tur pawisa min puk tir leh min rulhsak tur an tihchian hma in, heng consultancy firm te hi ka ruai ngei a ni tih pawh kan zuk hriattir a ngai nghe nghe a ni. Consultancy kan rawihte hi thiamna bik an nei ngei a ni tih pawh finfiah ngai a ni. Consultancy service kan mamawhna te chu hetiang hi a ni:

1) Consultancy Service for Project Management & Technical Support

2) Consultancy Service for Human Resources for Health

3) Consultancy Service for Result Based Financing & Project Evaluation

4) Consultancy Service for Improving Clinical Competencies

5) Consultancy Service for Construction of 3 Chief Medical Officer’s Office buildings at Saitual, Khawzawl & Hnahthial.

Consultancy firm ruai tur hian National Newpaper ‘The Hindu’ ah open tender notice chhuah a ni. Tender Notice hi Health & Family Welfare Department website-ah pawh mipuite en theih tura dah a ni bawk. Consultancy firm te hian tha taka tender/bid an chhan theih nan, Project chungchanga inhrilhhriatna hun online pre-bid meetings neihpui an ni a. Chutah chuan Mizoram chhunga empanelled firms hrang hrangte pawh an tel ve a ni. Heng pre-bid meeting-a tel tur hian sawmna hi Mizoram chhunga empanelled firms te pek vek an ni.

Consultancy hrang hrangin kan tender an chhanna te chu dan ang thlapa endik an nih hnu in Project Procurement Committee in a thlang a. Kan rawih hun chhung tur erawh a in ang vek lo thung. World Bank Procurement Regulations leh General Conditions in min phut anga kan Project a lo hlawhtlin theih nana heng Consultancy te hi lak an ni.

Tunah hian World Bank hian Mizoram chauh ni lo, India ram chhunga State hrang hrangah Project hi an kalpui nual a. Northeast-ah chuan Mizoram, Nagaland leh Meghalaya-ah te hetiang project hi kalpui mek a ni.