Vawiin khan Horticulture Department Secretary Pu B. Lalhmungthanga cuan Champhai Tlangsamah aieng sawngbawlna hmun (Turmeric Processing Centre) chu a tlangzarh. Tlangsam Turmeric Growers Society-ten Horticulture Department hmalaknaa aieng sawngbawlna hmun an sak thar hawnna inkhawm hi Pu R. Zotawna, Director, Horticulture Department chuan kaihruai a ni.

Pu B. Lalhmingthanga chuan aieng chu Mizoten kan hmang tangkaiin, ei tur sawngbawlna atan mai bakah ramhmul damdawi leh thil dang dang atan a tangkai hle a ni a tiin, vawiina processing centre hawn chu tangkai taka hman a nih a beisei thu a sawi a. Mizote chu ei leh in a intodelh thin hnam kan ni a, hun kal zelah rilru put hmang a dang chho hret hret a, tunhnu ah phei chuan thawk lova ei hmuh tum mai te pawh kan awm a ang ta hle a. Chutiang kara mi taima, mahni in tundin tum an awm zel chu a vanneihthlak tiin Pu B. Lalhmingthanga chuan Tlangsam Turmeric Growers Society chungah chu theih tawp chhuah zel turin a chah a ni.

Pu R. Zotawna chuan Society member-te chu an hmalakna zelah duhsakna hlanin, taima taka thawk zel turin a sawm a. Vawiin hunah hian Pu C. Lalremsiama, SDHO, Champhai Sub-Division chuan technical report pe in, aieng sawngbawlna centre atan hian Horticulture Technology Mission Fund atangin khawl dahna tur in leh tuikhuah chu sak a nih thu a tarlang a. Chowkidar in sakna te, khawl leh hmanrua hrang hrangte chu Mizoram Rural Bank-in kuthnathawktute hma ngaia a finance sak a nih thu leh, DC leh P&E Department tanpuinain khawl tih nun na tur power lak luh hna thawh a nih thu a sawi a ni.

Vawiin hunah hian Tlangsam Turmeric Growers’ Society Chairman Pu B. Biaktluanga chuan thu a sawi bawk a. Pu V. Lalzuithanga, DHO, Khawzawl Division chuan lawmthu sawiin hun hi a khar a ni.