Vawiin khan Tlangsamah District Tobacco Control Cell (DTCC) Champhai leh Champhai District Education Office tangkawp huaihawtin NEDP hnuaia Himna - MADAT (Mizoram Againts Drugs, Alcohol & Tobacco) Campaign neih a ni.

He hun Tlangsam YMA Hall-a hman hi Pu T. Sangtluanga, Tlangsam Teacher's Association President chuan kaihhruaiin Pu Lalrawngbawla, Social Worker, DTCC in project chungchang a sawi fiah a. Project hnuaiah Champhai District-ah School 40 thlan chhuah bik a awm thu leh Teacher training pawh Pu C.Lalbiakzuala, District Education Officer kaihhruaina hnuaiah neih tum a nih thu thu a sawi bawk. 

Pi Lalruatdiki Hnamte, Psychologist, DTCC chuan Vaihlo leh damdawiin hriselna a khawih pawi theih dan sawiin Mizoram hi India rama Cancer vei tamna ber state kan nih mek bakah Za zela 58 ten zuk leh hmuam chingin zuk leh hmuam ti tam ber 2-na kan ni mek a ni a ti a. Khawvel changkang leh hmasawn mekah zuk leh hmuam tih te, damdawi tih chinte hi a changkang tawh lo a ni a ti bawk.

He hunah hian Pu. Lalthafamkima Assistant Public Prosecutor cum Govt. Advocate chuan Legal Awareness  a nei a. IPC hrem theihna hrang hrang leh Cyber Crime chhungchang naupangte hnenah zirtirna a pe bawk. He hunah hian Tlangsam High Scool, Govt Middle School, Govt Primary School-I leh II, Presbyterian English School, leh T.M. English Medium-te atangin school naupang leh Zirtirtu an tel a ni.