Centrally Sponsored Scheme (CSS) sum cheng nuai 241.19 senga sak DIET Champhai Administrative Building thar Champhai Zotlang a mi chu vawiin khan School Education Minister Pu H.Rohluna’n a hawng. He hunah hian Pu TT Zothansanga, Champhai North bialtu MLA chu khualzahawm a ni.

Khuallian Pu H.Rohluna chuan Education Training Centre Champhai lung phum anih hnu lawka DIET Champhai Building tha tak hawn a ni leh chu thil lawmawm leh chhinchhiah tlak tak anih thu a sawi a. Mi thahnem ngai leh thil phalte zara DIET changtlung tak neih a ni thei chu fakawm a tiin, Principal leh thawktute inpekna pawh chuanawm a ti a. Sawrkarin Zirna angaih pawimawh tluk zetin hmun hma thuam that chu angai pawimawh a, tunhnai maiah District hrang hranga DIET building tharte hawn a nih thu sawiin, la hawn ve loh Serchhip DIET pawh remchan ve leha hawn thuai tum a ni, a ti a. Quality Education chu chawpleh chilha thleng thei ani lo a, a hmun hma leh kailawnte siam that phawt angaia, chumi  tur chuan Infrastructure tha tak siam hmasak hi thil tul hmasa a ni, a ti bawk.

Education Minister chuan Zirna tel lovin ramin hma a sawn theih loh thu sawiin, sawrkarin Zirna a ngai pawimawh a sum harsa tak karah pawh Zirna tih hmasawn hram hram a tum tlat a ni, a ti a. Zirna tihhmasawn chu Education Deparment kutah chauh dah lova, tanrualna tha tak leh mahni theih ang ang hmanga hmalak tlan a ngai a ni, a ti a.  Zirna hmunhmate pawh thuamthat zel niin, Cheng Vaibelchhe 10 senga Education Complex siam tum ani thu leh Treasury Square, Aizawlah Education Centre changtlung tak cheng vaibelchhe 9.5 vel senna tur sak zawh tep anih thu a sawi bawk a. Department hmunhma cheithat hna pawh NEDP leh NABARD sum hmanga thawh anih thu sawiin, Zirna In, Office, Quarters engemaw zat siam that anih tawh bakah a dangte pawh siam mek zel a ni, a ti a. Zirtirtute hnena training tha tak pek chu khawvel inherdanglam zelah a pawimawh thu leh Zirlai naupangte chherchhuah kawngah a awmzia a neih hle thu a sawi a. Minister chuan  tun dinhmunah Aizawl leh Lunglei DIET-ah te B.Ed zirna kalpui mek a ni a, India ramah Odissa State leh Mizoram chauh hetianga kalpui thei hi an awm rih a ni, a ti a. DIET hmangin District tinah Zirtirtu leh Zirtir hna lama tuite tan training hrang hrang kalpui anih thu sawiin tun aia nasa a DIET chu char tangkai nise a duh thu sawiin,  midangte hnena DIET hmalakna hriattir nasat angaih thu a sawi a. DIET hmangin in-service, Pre-service leh midangte tan training kalpui a ni thu leh DIET chuan Quality Education pekchhuah hi a tum tlat a ni, a ti a.  

Pu. Rohluna chuan Zirtirtu sawrkarin a duh uluk a, Zirtiru lak kawngah pawh MPSC kaltlang vekin Recruitment rules ang thlapa kalpui thin a nih avangin Zirtirtu nih tumte chu thiamna tak tak nei tei tura tan la turin a chah a. Education Department-a thawktute thalawpna leh tawiawmna zarah Zirna kawngah hmasawnna tam tak hmuh theiha a awm chu lawmawm a ti a, indaihlo chung pawha an thahnemngaih thinna chu fakawm a tih thu a sawi a ni.

Khuazahawm Pu TT Zothansanga pawhin thu sawiin School Education Department hmalaknaa Champhai District mai bakah Mizorama Zirna tihchangtlun a ni chu fakawm a tih thu a sawi a. Zirna tha nei tur chuan Zirtirtu tha mamawh a ni a, chu chu  sawrkarin hriain Training Centre-te a ti changtlung mek zel a, trainees-te pawh chhawr tangkai tum theuh turin a chah a. Zirtirtu nghet te pawh an chungah sawrkarin rinna  anghat ngam ani tih hriaa, taima leh rinawm taka thawk thin turin a fuih bawk a. Sawrkar duhsakna changa Champhaiah Zotlang Field leh Champhai College Building thar hawn ani chu thil lawmawm tak a ni a, Keilungliah Recreation Centre pawh tun atanga reiloteah tan a ni dawn bawk a ni, a ti a. Zirna kawngah Champhai District chu tan lak angaih thu leh Zirlaite pawh lehkha chhiar uar thar leh tura a duh thu a sawi a. Hmasawnna kalzelah tumah an ral bang bik loh avangin mitinte chu theihtawp chhuaha ram leh hnam tana tan la thar turin a sawm nghal bawk a ni.

Hawnna programme hi Pi Esther Lal Ruatkimi, IRS, Commissioner & Secretary, School Education Department chuan kaihruaiin kalkhawmte lawmna thu a sawi a. Pu R.Lalramliana, SDO, PWD Project Sub-Division Champhai chuan Technical report a pe a. Pu RL Thianghlimma, Principal, DIET Champhai leh Pu K.Laldingliana, MCS, Director, School Education Department-ten report an pe a. School Education Minister-in DIET sak anih theihna tura a ram phal taka petu Pu Lalsaluaia, Champhai Zotlang hnenah thilpek a hlan a. Pi Laldawngliani Chawngthu, Director, SCERT-in lawmthu sawiin hun a khar a ni.

Vawiina hawn tak DIET Building thar hi a dung metre 23 leh avang metre  14 niin ram square metre 322 a zau a awh a. June Ni 18, 2015 ah hna tan niin September Ni 26, 2016 khan sak zawh tawh a ni. Mizopa chhiara chhawng thum RCC structure a sak a ni a. Central sawrkar atangin cheng nuai 91 hmuh leh tur niin hemi hmang hian Vertical Extension thawh leh tur a ni a. DIET building tharah hian Classroom, Seminar room, Library, Computer Lab, Lectures Room., Administrative Staff room, Principal room leh Laboratory-te a awm a ni.

DIET Champhai hi kum 2004 ah Telescope DIET/ Mini DIET ti a din a ni a. Kum 2013 khan DIET puitlinga hlankai a ni a. Tun dinhmunah Zirlai 82 leh Zirtirtu 10 an awm mek a. Mi 314-ten DIET Champhai atangin training an chhuak tawh a. IGNOU Study Centre leh NIOS Study & Exam Centre a ni a,  kum 2014 atang khan in-service tan training an kalpui tan bawk a ni.