NEDP sum cheng nuai 200 senga   Education Training Centre Champhai sakna tur lung chu vawiin khan School Education Minister Pu H.Rohluna’n a phum. He hunah hian Champhai North bialtu MLA Pu TT Zothansanga chuan Minister hi a tawiawm a ni.

Lung phumna  hun Programme tawi  Pu K.Laldingliana, Director, School Education Department kaihhruaiah Pu H.Rohluna chuan Sawrkarin Zirna tih hmasawn kawngah nasa takin tan a lak thu leh hmun hma tha zawk nei thei tura tan a lak thu a sawi a. Education Centre Champhai sak hna chu tan nghal mai tur ani a, Cheng nuai 25 sengin DEO Quarters pawh sak thuai tuma buaipui mek a ni, a ti a. Education Department chu Department upa pawl anih avangin hmun hma tam takte thuamthat angaih tawh em avangin sawrkarin a ngaipawimawh a, NEDP leh NABARD kaltlangin engemaw chen siam that niin hma lak mek zel anih thu a sawi a. Treasury Square Aizawlah Education Centre Changtlung tak cheng vaibelchhe 8 chuang senga sak mek anih thu leh NEDP kaltlanga cheng nuai 150 belhchhaha thuamthat leh a hawn thuai tum a ni, a ti a. Zirtirtu thingtlang a awm te tan pawha mahni hmunhma ngeia  zangkhaina siam chu zirna hmasawnna kawnga tul tak a nih thu tarlangin Teachers Quarters za dawn sak zawh tawh a ni a, HADCO Soft Loan hmangin Finance Department nena tangkawpin khawtinah Teachers Quarter 2 tal sak tum anih thu a sawi a.  Zirna infrastructure tih changtlun hmasak chu Quality Education kailawn hmasa a nih thu leh Training tha tak zirtirtuten an neih chu a pawimawh thu a sawi a ni.

Education Training Centre hi DEO Complex, Champhai Kahrawt-ah sak  a ni dawn a. Cheng nuai 200 senga sak tur niin,  Zirtirtute trainingna tur a hman raw hrang hrang bakah Guest Room leh Garage-te pawh a awm thei tur a ruahman a ni a. Mizopa chiara chhawng nga tur niin Zirtirtute intuaitharna hmun tur a ni.

Education Training Centre lung phumna hunah hian Pi Esther Lal Ruatkimi, IRS, Commissioner & Secretary, School Education; Pu K.Laldingliana, MCS Director, School Education; Pi Laldawngliani Chawngthu, Director, SCERT, Sawrkar Official dangte leh sawm bikte an tel a ni.