464/2022-2023
Champhai, the 11th May, 2022: Vawiin khan Champhai Town Land Committee chu an Chairman Pu James Lalrinchhana, District Collector hovin DC Conference Hall-ah an thukhawm. He hunah hian Champhai khawpui chhunga house pass, periodic patta leh land lease dilna lut 199 te ngaihtuahho niin, heng zinga 187 te chu pawm a ni.

District Collector Pu James Lalrinchhana chuan house pass, periodic patta leh land lease dilna lut pawm tharten document pawimawh tak an nei thei tur chu a lawmpui thu leh dan ang takin sawrkara chhiah a lut thei tawh tur chu lawmawm a tih thu a sawi a. Hun engemawchen hnua Champhai Town Land Committee thukhawm a ni leh thei ta chu lawmawm tiin, kum khatah vawi 2 aia tlem lo thutkhawm neih thin tum a ni, a ti a. Thutkhawm neih hmaa ngun taka zirchianna VC leh khawtlang hruaituten an lo nei lawk leh inpuahchahna tha tak an nei chu fakawm tiin, khawtlang aiawha roreltute an nih angin khawtlang tana tha ber tur thlir chung zela ngaihtuahna nasa zawk seng zel turin a chah a ni.

Pu James Lalrinchhana chuan khawpui thang zel leh nakin hun thlenga khawpui hmakhua ngaihtuah chunga hmalak a tul thu sawiin, awmze nei taka Champhai khawpui cheimawi, thuamthat leh hmasawnna kalpui kawngah hmathlir thui tak neih a ngai a ni, a ti a. Land Committee chu ram humhalhna atana pawimawh tak, khawpui ruangam din kawnga tangkai tak a nih avangin kum lo la kal zel tur thlir chungin dilna lutte ngun taka zirchian hmasak thin a ni, a ti bawk.

He hunah hian Pu Vanlalchhuanliana, Settlement Officer & Member Secretary, Champhai Town Land Committee chuan dilna lut hrang hrangte endik a nih dan a sawifiah a, Champhai Town Land Committee report a pe bawk.

Vawiin Champhai Town Land Committee thutkhawmah hian Champhai khawpui huamchhunga veng leh khua 17 atanga dilna lut hrang hrang 199; house pass dilna 197, periodic patta dilna 1 leh land lease dilna 1 te zirchiana ngaihtuahho a ni a. Land Revenue & Settlement Department zirchianna leh record neihte behchhana Champhai Town Land Committee-in ngun taka dilna lutte a ngaihtuah hnuah dilna lut 199 atanga 187 te chu pawm a ni a, dilna 1 (house pass) hnawl niin dilna dang 11 (house pass) te chu enho leh nise tih a ni bawk.

Vawiin Champhai Town Land Committee thutkhawmah hian line department hotute, VC, NGO leh political party aiawhte an tel a ni.