463/2022-2023
Aizawl 11th May 2022: Vawiin khan India ram hmun dang rualin National Technology Day vawi 24-na hman a ni. He Ni lawmna hun hi Directorate of Science & Technology huaihawtin MINECO-a Innovation Facility Centre-ah neih a ni a, Human Resource Development Board Vice Chairman Pu L. Thangmawia, MLA-in a hmanpui.

HRD Board Vice Chairman Pu L. Thangmawia chuan technology hi Mizote chem kalna lam tak a ni a, technology thar pian tir theihna tur tam tak kan velah a awm a ni a ti. Pi leh pute hun laia an mamawh mil technology an siam chhuak thei a, tun hunah pawh Zopa technology tangkai tak tak – Arhmul pawhna, changel channa, Kuhva rah thelna, Vaimim fang nuaina, buh den chipna, nimbu tui sawrna, agarbati stick siamna leh adangte Zopa scientist te hian an siamchhuak thei hi an chhuanawm tak zet a ni a ti. Mizoram mil Zopa Technology tih changtlun zel nan Innovation Facility Centre (IFC) hi hawn a ni a, he Centre kaltlang hian Zoram mamawh technology thar piangchhuak tur tam tak a la awm zel dawn a ni, a ti. Technology hmasawnna atana theihtawp chhuah turin thangthar mi thiam te a sawm bawk. HRD Vice Chairman hian State Meteorological Centre khawl thar; mipuiin mobile phone atanga Aizawl khawchin an en theihna tur Aizawl Automatic Weather Station chu vantlang hman theih turin a hawng nghal bawk.

National Technology Day puala hun buatsaih hi Planning (Science & Technology) Department Secretary Pu Lalmalsawma Pachuau chu khualzahawm niin a hmanpui bawk a. Innovation Facility Centre-in thianghlim leh hrisel taka Sa repna an siamchhuah ‘Repmawi’ a tlangzarh bawk a ni.

National.Technology Day inkhawm kaihruaitu Chief Scientific Officer Er. H Lalsawmliana’n lehkhabu ‘Zoram mil technology, Volume-I’ a tlangzarh nghal bawk. Senior Scientific Officer Pu F. Lalramchuana’n Mizorama Science & Technology hmalakna leh hlawhtlinna hrang hrang a lem nena entirin a sawifiah a ni.

Vawiina National Technology Day lawmna hi Science & Technology hnuaia MISTIC, MIRSAC leh Science Centre Governing Body leh Executive Body member te, Science leh Technology hmasawn nana thawktu tlawmngai pawl hrang hrang – Mizoram Science Society (MSS), Science Teachers’ Association, Mizoram (STAM), Mizo Academy of Sciences (MAS), Mizoram Mathematics Society (MMS), Geological Society of Mizoram (GSM) bakah Science lama mi hmasa- sul lo sutu engemaw zatin an telpui a ni.

National Technology Day hi kum 1998-a India-in ama kutchhuak technology khawvel hriata a phochhuah ni a ni a. Khatih hunlai khan khawvel hriatah India ram chuan Nuclear siam thei ram a nih zia lantir nan Rajasthan a Pokran-ah Nuclear hlawhtling takin a enchhin a, 'Trisul' Missile hawhtling takin a enchhin bawk, Thlawhtheihna 'Hansa-3' an vuah chu he mi ni hian hlawtling takin a thlawhtir bawk a ni. Kum 1999 atang khan kum tin ram hmasawnna atana technology pawimawhna inhrilh hriatna leh inzirtirna hun atan he ni hi hman thin a ni.