Vawiin khan Champhai Town Sanitation Task Force hmalaknain Champhai daifema awm Keilungliah lui leh a kam thianfaia hnatlang neih a ni

Lui kawr tifai hnatlang neih tan hma hian inkhawm tawi CHANEM Building tualzawlah buatsaih a ni a. He huna khuallian Pu C. Lalbiakzauva, DEO/DPC RMSA chuan Champhai khawpui daifema lui kawrte chu khawpui tlan tuihna pawimawh tak an nih avangin uluk taka enkawl a tul thu a sawi a. Polythene tuia inchiah, hlo thahna leh thlai venna atana kan hman zawng zawngte chuan tur hlauhawm tak an pai a, mumal taka sawngbawl anih loh chuan a tur hlauhawmte chu keimahni bawkin kan ei leh thin a ni, a ti a. Bawlhhlawh paih dan leh chemical hman chungchangah tun aia fimkhur a tul thu a sawi a. Champhaia School engemawzatah Eco Club din a nih thu leh thing leh mau humhalh kawngah hmalak chhoh mek anih thu a sawi a. Nature camp vawi 3 neih tuma hmalak mek a nih thu a sawi bawk a. Faina kan buaipui mek lai hian kan environment humhalh kawngah pawh hma kan lak thar zel a pawimawh a ni tiin, Keilungliah  lui leh a kam tifaia hnatlang turte chu a vai liam a ni.

Programme hi Pu K. Lalhmuakliana, DUDO Champhai chuan kaihruaiin bawlhhlawh thenfai mai nilo thinlunga faina nun tuhngheh chu thil pawimawh leh an tum bul ber anih thu a sawi a. Kalkhawmte chu bawlhhlawh paih chungchangah fimkhur turin a chah a. Faina hnatlang neih dan turte inhrilh hriatna hun hman nghal a ni.

Keilungliah thianfaia hnatlangah hian Govt. GM Higher Secondary School pawl 11 zirlai naupangte leh zirtirtute an thawkchhuak a. Thuang hnihah inthenin Champhai Venglai thlanmual atanga kal leh Champhai Bethel Vengthar atanga a let zawnga kal awm bawkin lui dung leh kawr a bawlhhlawh awmte an thianfai a, hnatlang tur hian school naupang 300 vel an thawkchhuak thei a ni.