1561/2026-2027

Champhai, dated 29th July 2026: Champhai Town Sanitation Task Force Committee chu vawiin khan DC Conference Hall, Keifangtlang ah an thukhawm a, Champhai Bawrhsap Pu Mohammad Aaquib chuan a kaihruai.

Chairman Pu Mohammad Aaquib chuan faina kawngah Champhaiin hma a sawn zel tih sawiin Mizoram District hrang hrangah kum 2024 khan pasarihna a nih laiin kuminah chuan palina a nih phak tawh thu a sawi a, hma sawn zel turin chhungkaw tinte a sawm. Sawrkar Department hrang hrangah July ni 31 hmaa Solid Waste Management rules in a phut angin bawlhhlawh bawm pali hun ngei ngei tur a ni a, bawlhhlawh thliar hran dan tur ang thlapa thliar hran tur niin uluk taka an vil zui tur thu a sawi bawk.

Pu Ngulzathuama, DUDO hnen atangin Solid Waste Management Rules hrang hrang ngaihthlak a nih bakah he rules in a ngaihpawimawh bik hrang hrangte ngaihthlak a ni a, bawlhhlawh bawm 2 hman thin chu bawm 4 ah tihdanglam a nih tawh thu a tarlang bawk. Heng bakah hian Champhai leh a chhehvela bawlhhlawh tam thinna hmun hrang hranga hma an lakna a tarlang a, Solid Waste Management dan bawhchhiat theihna leh dan bawhchhetu hrem theihna te a tarlang bawk.

Champhai Solid Waste Management Centre hman dan tur leh Champhai District chhunga Solid Waste Management Rules 2026 leh Plastic Waste Management Rules, 2016 hman dan tur sawiho a ni a, kum 2025 a an lo tih tawh angin Sawrkar Department hrang hrang a thawkte chuan pawisa thawhkhawm leh an rem ti a, Group A, B, C leh D te'n an thawh tur erawh chu a inang dawn lova, heng an pawisa thawhkhawm tur hi August ni 7 ah DUDO office ah thehluh tur a ni a, harsatna nei an awm chuan intihluihna a awm dawn lo a ni.

Solid Waste Management Rules 2026 hi India ram pumpuiah April ni 1, 2026 khan hman tan a ni a, rules hi hman a nih dan leh ken kawh a nih dan hi Supreme Court chuan uluk takin a vil zui a, mawhphurhna nei ten hna an thawk tha em tih a vil reng thin a ni.

Sanitation Task Force Committee chuan kum 2025 khan pawisa an thawhkhawm hmangin hmun 21-ah chetchhuah a ni a, heng hmun hrang hrangah hian an pawisa thawhkhawm cheng 2,12,420 hman zawh a ni a, tunah hian bawlhhlawh hrang hrang sawngbawlna hmun buatsaih mek chu hman theiha peihfel tep a ni tawh bawk.