1562/2026-2027

Saitual, the 29th July, 2026: Vawiin khan Mizoram States Aids Control Society (MSACS) leh District AIDS Prevention and Control Committee tangkawp buatsaih District Red Ribbon School Quiz Competition chu Govt. Saitual College Auditorium-ah hman a ni a, DAPCC chairperson, District Bawrhsap ni bawk Pu Srinivas Sadi chu khuallian niin hun a hmanpui. Vawiin quiz competition a lawmman pakhatna latu hi Presbyterian English School, Saitual niin, State Level-ah District aiawhin an chhuak dawn a ni.

He hunah hian khuallian Pu Srinivas Sadi chuan naupangte hnenah HIV/AIDS awareness chungchangah fuihna thuchah a sawi a, zirlai naupangte hnenah fimkhur a tulzia tarlangin, a kai tawhte pawh thinhrik mai lova kawm tlangnel nachang hre turin a chah a ni. Bawrhsap chuan tun hmain HIV positive-te thi vat tura kan ngaih thin kha kal pelh a tul tawh tih a sawi a, thisen test hma leh enkawl hmain kawngro a sut zia te a tarlang nghal bawk. Zirlaite chu Red Ribbon Quiz Competition-a an zir chhuahte chu an thiante leh an chhungte hnenah hrilh turin a chah a, he quiz a hlawhtlin nana tha leh zung sengtu zawng zawng te chungah lawmthu a sawi bawk a ni.

Saitual District Level Red Ribbon School Quiz Competiton neih zawh taka lawmman dawngtute chu: 

1st Prize: Presbyterian English School, Saitual

2nd Prize: Govt Saitual High School

3rd Prize: Oxford English School, Saitual 

Consolation Prize hi Lailak Secondary School ten an dawng a, School tel zawng zawngin participation certificate an dawng bawk.

Vawiin District Red Ribbon Quiz Competition-ah hian khuallian Pu Srinivas Sadi chuan thu sawiin, lawmman, pawisa fai leh certificate a sem nghal a, Dr. Zothanpari Chhakchhuak, Dy. CMO chuan Red Ribbon Quiz an buatsaih chhan te a tarlang nghal a, Pi F. Zodingpuii, DIPRO chu Quiz Master atana ruat a ni.

District Red Ribbon Quiz Competition-ah hian Saitual District chhunga school 10 an tel a. Pakhatna hi State Level-ah District aiawhin an chhuak ang a, State Level-a pakhatna te hi Regional Level-a inel tura chhuak lehin, chumi an paltlang chuan National Level inelnaah an chhuak leh dawn a ni.