1563/2026-2027

Champhai, dated 29th July 2026: Mizoram State AIDS Control Society (MSACS) leh District AIDS Prevention Control Committee (DAPCC) te buatsaih, District Level Red Ribbon School Quiz Competition 2026 chu vawiin khan khar a ni a, Addl. DC Pu Lalbiakfela chuan khuallian niin a hmanpui.

Khuallian Pu Lalbiakfela chuan thu sawiin, Mizoramah mi 26,000 velin HIV hri kai an awm thu a sawi a, nasa zawka HIV/AIDS chungchang inzirtirna neih a tul thu a sawi. He natna hi Mizoramah a kiam zel theihna tura mahni theihna leh hma zawnah theihtawp chhuah zel turin zirlaite leh mipuite a sawm a ni.

District Level Quiz Competition a pakhatna te chu State Level-ah an kal leh dawn a, theihtawp chhuah zel turin a chah a, Champhai ti hmingthatu ni ngei turin duhsakna a hlan a ni.

Dr. Walter Lalnuntluanga, CMO chuan kharna inkhawm hi kaihruaiin Mizoramah Champhai hi percentage-a chhutin HIV kai tam berna a nih thu a sawi a, fimkhur a ngaih hle thu a sawi. High School zirlaite chu nakum lawka kan ram hruaitu tur an nih avangin tun atanga lehkha zir kawngah nasa lehzuala tan la turin a chah.

District Level Red Ribbon Scool Quiz Competition 2026 ah hian School 9 atangin mi 10 an tel a, BC English Academy team 1 te pakhatna an ni a, BC English Academy Team 2 te pahnihna an ni a, Holy Mission School te pathumna an ni. PES Zotlang te hnenah Consolation Prize hlan a ni bawk.

Pu Lalthlamuana Tochhawng, SDEO chuan lawmthu sawiin hun a khar a ni.