1706/2022-2023
Champhai, the 25th August, 2022: Champhai khawpui fai leh thianghlim siam tura hmalatu, Champhai Town Sanitation Task Force chu vawiin chawhnu dar 2 khan an Chairman Pu James Lalrinchhana, District Bawrhsap hovin Mizoram Khawpui Fai Intihsiakna leh Swachh Survekshan chungchanga hmalak dan tur ngaihtuahin I&PR Conference Hall, CHANEM Building-ah an thukhawm.

Pu James Lalrinchhana chuan Champhai Town Sanitation Task Force chu Champhai khawpui mawi tak vawnfai mai bakah, thianghlimna kawnga hma a sawn theih nana mawhphurtu Sawrkarin dan mumal tak tlawhchhana din a nih thu a sawi a. Tunhnaia faina kawnga hmalakna hrang hrangte chhuanawm a tih thu leh faina kawngah tanlak zel a tul thu sawiin, inthlahdah hman kan ni lo a, inzirtirna tam zawk neih kan mamawh a ni, a ti a. Mipuite thinlungah fai duhna thinlung tuh hmasak ngaihpawimawh a tul thu tarlangin, mahni in leh a vel tifaiin bul kan tan a ngai a, faina chu tun hun mai nilo kumtluana buaipui leh inthlahdah lova kalpui tul tak a ni, a ti bawk.

Member Secretary Pi R.Lalnunkimi, District Urban Development Officer (DUDO) Champhai chuan Mizoram Khawpui Fai Intihsiakna leh Swachh Survekshan chungchang powerpoint presentation hmangin a sawifiah a. Khawpui fai intihsiakna kaltlanga hmalak tawhna leh hmachhawpte a tarlang bawk.

He hunah hian nikum lama Mizoram Khawpui Fai Intihsiakna hmanga hmalak dan leh Champhai dinhmunte thlirlet niin, insiamthat leh tanlak ngaihnate sawiho a ni a. Kumina khawpui fai intihsiakna kalpui chhoh meka hmalak dan turte thlirho a ni bawk a. Hman khat daih plastic, Single Use Plastic hmang tlem tura tanlak ngaihnate bakah bawlhhlawh sakhat sawngbawlna, Solid Waste Management kalpuina tura hmalak tul hrang hrang; bawlhhlawh khawnkhawm, tawih thei leh theilo thliarhran, hnawm atanga thil tangkai leh hlu zawk siam chhuah chungchangte, Public Private Partnership (PPP) Mode-a Solid Waste Management kalpui a nih theih dan turte bakah vantlang zun in leh ek in felfai zawka enkawl dan turte sawiho a ni a, veng tina enkawltu tur inruat ni se, UD&PA siam Bazarpuia inthiarna hman man Rs. 10/- zel lak nise tih a ni a. Bawlhhlawh tawih thei leh theilo thliarhrana lakkhawm hna pilot project kalpui mekna Tlangsam bakah town area hmun dangahte pawh kalpui tura hmalak tha tih a ni a. PPP Mode-a Solid Waste Management kalpui chu Dinthar Veng leh Hmunhmeltha-ahte kalpui ni se tih a ni bawk.

Meeting-ah hian veng chhung faina leh hmasawnna turin Village Level Cleanliness Committee, YMA leh Kohhrante hrang hrangte an huamchhungah theuh theihtawp chhuah tura committee hminga ngenna siam ni se tih a ni a. Sawrkar Department-te pawh an hmunhmate enkawl fai theuh tura beisei an nih thu tarlan a ni a. Faina kawnga veng hrang hranga hmalaknate endik thintu tur Champhai Town Sanitation Task Force Monitoring Team din ni se, Road Protection Squad nen a tul angin endikna leh mipuite zirtirna kalpui thin se tih a ni bawk.

Neutral Zone hrang hrangte tifai turin School-te ambassador-ah ruatin Zirlaite thinlungah fai nih duhna tuh a nih theih nan intihsiakna siam a, mipuite hnena faina chungchang inzirtirna huapzau zawka kalpui ni se tih a ni a. Khawpui fai intihsiakna tehfung hrang hrangte VC leh YMA hnenah chiang zawka hrilhhriat ni se tih a ni bawk a. Mipui thlawpna citizens' feedback tha a awm theih nana hmalak tulte pawh sawiho niin, September thla chhungin faina hnatlangpui neih ni se tih a ni bawk.

Champhai Town Sanitation Task Force thutkhawmah hian Pu B.Lalchhawntluanga, PD, DRDA; Pu Lalnunfela Chawngthu, SDO Sadar; Dr. R.Lianmawia, CMO; Pu T.T Laltanpuia, DEO; Dr.Lallawmkima, DIRPO; Pu Vanlaltluanga Parte, SDPO; Pu Vanlalmuanawma, SDO, PHED; VC leh NGO hotute an tel a ni.