11/2022-2023
Champhai, the 1st April, 2022: March ni 10, 2022 a Champhai Town Vending Committee thukhawmin kawngsira inzuar, street vendor-te inpho leh inzawrh phalna tura a pawm 'Vending Zone' nilo, kawngsir leh duh duhna hmun remchang laia khawpui tichep leh tihmelmawilo zawnga thil zuar thinte endik leh, dan zawmlote chungah a tul anga hremna lekkawh nise tia a rel bawhzuina kalzelah, hemi kawnga hmalatu tur Joint Enforcement Team din thar chuan vawiin atang khan endikna an kalpui tan.

Town Vending Committee member-te hian vawiin chawhma dar 11 khan Champhai khawpui chhunga inzawrh/inpho phalna hmun tura pawm vending zone ni lova chawhmeh/bungrua zuar an awm leh awm loh an endik a. Mi nawlpuiin thupek an zawm tha hle a, Town Vending Committee District Bawrhsap hova March ni 10, 2022 a thukhawmin an lo rel tawh angin inzawrh phallohna hmuna thu thinte hi lehkha pek niin, March ni 31, 2022 hnulamah inpho tawh lo tura hriattir an ni tawh a ni. Joint Enforcement Team te hian vawiin April ni 1, 2022 atang hian a tul ang zelin endikna an nei thin dawn a ni.

Joint Enforcement Team-ah hian District Urban Development Officer (DUDO), District Merketing Officer (DMO), Police, NGO te leh VC aiawhte an tel a. Dan palzuta tiluite chu 'The Mizoram Street Vendor (Protection of Livelihood and Regulation of Street Vending) Repeal Act, 2017 tlawhchhanin hrem theih an ni dawn a, receipt challan hmanga fine lak zel tur a ni ang.

March ni 10, 2022 a Champhai Town Vending Committee thukhawm chuan Champhai khawpui chhungah kawngsira inzawrh phalna hmun vending zone hmun 22 a pawm a. Inzawrhna hmun tur duhte tan a tul dan ang zelin Bazarpui-ah seat pek theih a nih thu District Marketing Officer chuan a lo tarlang tawh bawk a ni.