National Urban Livelihood Mission (NULM) hnuaia kawngsira inzuar (street vendors)-te puihbawmna Champhai khawchhunga kengkawh tur "Town Vending Committee" chu a vawikhatna atan vawiin khan Champhai I&PR Conference Hall-ah an thukhawm. Committee hian The Mizoram Street Vendors Act, 2011 in a ruahman anga kawngsira inzuarte tanpuina leh khuahkhirhna dan  Town Vending Plan ngaihtuahin an thukhawm a ni.

Committee kaihruaitu Member-Secretary Pi V. Lalmuanpuii, District Urban Development Officer chuan kawng kama thil zawrh chuan mimal eizawnna a siam bakah khawpui rethei chawikanna hmanrua pawimawh tak a nih avangin NULM chuan street vendor-te inphona tur hmun bik hauh sak te, awlsam zawka loan hmuh pui dan ngaihtuah te, training pek bakah tanpuina hrang hrang pek a nih tur thu a tarlang a. Heng karah hian inphona hmun bik leh khuahkhirhna felfai tak a awmloh chuan khawtlang tana thil duhawmlo leh faina kawngah te harsatna a awm thin thu tarlangin Pi V. Lalmuanpuii chuan khawtlang thatna tur a ni tih hre chunga Plan tha tak siam turin leh a kenkawh hun thleng pawhin committee member-te chu inlungrual taka thawkho turin a sawm a ni.

Vawiin committee-ah hian plan siam bakah kawngsira inzuarte tana awlsam zawka loan lak theih dan sawiho a ni a. Bank thawktute chuan tanpui an inhuam thu tarlangin, rilru puitling tak pu a, hlawhtlin ngei tum tan chuan an inhawn reng thu an sawi a ni.

Champhai Town Vending Cmmittee-ah hian Chairman chu Champhai Deputy Commissioner niin, DUDO chu Member-Secretary a ni a. Member-ah hian SP, District Research Officer, Merchants' Association President, Street Vendors' Association Office Bearer-te, Joint Village Council Chairman leh Secretary bakah SBI, Mizoram Rural Bank leh Apex Bank Branch Manager-te theuh an tel a. An ni bakah hian vawiin committee-ah hian Sorkar Department leh NGO thenkhat atangin Special Invitees an tel a ni.