Chief Minister Pu Lal Thanhawla chuan vawiin khan Assembly Annexe conference hall-ah Horticulture Fair 2015 a hawng.

Chief Minister chuan kan ram hi thlai chi tam tak that duhna, ram tha, sik leh sa leh ruahtui tamna a ni a, thiam taka kan hman tangkai a tul hle a ni a ti a. Hemi kaihhnawiha Horticulture Fair buatsaih a ni chu a lawmawm tak meuh a ni a ti a. Kuthnathawktute hi sorkar-in a ngaipawimawh hle a ni tiin, department tin hian ngaihpawimawh hmasak berah dah thin se a ti a. NLUP pawh hi kuthnathawktute tana kalpui a ni a ti a. Chuvangin hlawhtling tak tak tur chuan mahni inphat a, tih tak takna leh neitu nihna nen thawk a, eirukna hri chhia lakah fihlim angai a ni a ti. Kuttling lova thil tih leh tum hi hmasawnna daltu lian tak a ni a, sorkar-a thuneitute pawh eirukna leh induhsak bikna awm lova. Rualkhai taka kuthnathawktute hmakhua dah pawimawh turin a chah a ni. Kan thlen chin atang zel hian hmasawn kan tum tur a ni, Pu Hawla chuan a ti.

Chief Minister chuan buh leh thlai thianghlim tharchhuahna organic farming chak zawka kalpui tul a tihthu sawiin, pawnlama thlai thar, ddt hmanga an chawm lente kan lalut reng hi tih tawp a tul hle a, hemi atan hian sorkar pawhin ruahmanna a siam mek a ni a ti a. Ei leh bara kan intodelh lohzia sawiin, Chief Minister chuan kum khata thla thum daih pawh kan thar chhuaklo a, vai ho tharchhuahah kan innghat a, a chhuanawm loh hle a ni tiin, hemi atanga tal chhuah hi kan tih makmawh a ni a ti. Chuvangin taimakna, rinawmna, dikna leh tumruhna nen ei leh bara intodelh theihna turin kan zavaia kan tan tlan angai a ni a ti. Horticulture chu thalaite tana mahnia eizawnna insiam sak theihna a ni tiin, an tluk luhna tur a ni a ti a. Kuthnathawktu farmers te chu mithiam zawkte kaihhruaina zawm thiam tura chahin, Taiwan leh Korea mithiam ten horticulture leh agriculture lama min thawhpuina turah phur tak leh thuawih taka thawhpui turin a chah bawk a ni.

Khualzahawm Pu P.C. Lalthanliana, Horticulture Minister chuan sorkar-na siam apiangin kuthnathawktute an dah pawimawh vek thin a ni a ti a. Tuna sorkar hian NLUP a kalpui meknaah a tih tur a hmaih lova, farmers zawk ten an tih tur an tih loh thin avangin hlawhtlinpuilo an awm a ni a ti a. Horticulture potential area haichhuah kim anih hunah link road pawh siam vek a ni ang a ti a. Kan rama tha duh em em pawnlam atanga thlai engmawzah kan la lalut reng mai hi kuthnathawktu farmerte hian ngaihtuah chian a hun a ni a ti a. An tharchhuah thlaite chu pawnlam atanga lakluh aia tlawma hralh tum tura chahin, an hralh zung zung  phah thei dawn a, to taka zawrh hian hralh theih lohna a siam thin a ni a ti.

Horticulture Fair hi kum 2012 atanga buatsaih tan a ni a, hemi kum hian dawr 57 siamin Rs.17 lakhs chuang an hmu a, kum 2013ah Rs.22.9 lakhs leh nikum 2014ah Rs.12.4 lakhs vel an hmu bawk a ni. Fair hi kuthnathawktu farmers te tana buatsaih a ni a, district tin atangin mi 10 theuh hemi ‘Fair’a tel tur leh thlai leh pangpar enkawl dan zirtirna training nei tura thlan an ni.

Hawnna inkhawm hi Pu R.Zotawna, Director, Horticulture departmentin a kaihruai a. Pu K.Lalrinthanga, Parliamentary Secretary, Pu John Siamkunga, Chairman, Mizoram Law Commission, Pu Vanlalzawma, MLA leh Pu Lalruatkima, MLA te Fair hawnnah hian an tel a, Florist Association hotute an tel bawk a ni.