No.4228/2021-2022

Aizawl the 10th March, 2022: Vawiin khan Champhai Town Vending Committee chu an Chairman Pu Henry C. Lalrawnkima, District Bawrhsap hovin kawngsira inzuar (street vendors) te inpho/inzawrh phalna (vending zone) turte ngaihtuahin DC Conference Hall-ah an thu khawm.

He hun kaihruaitu Pu Hrenry C.Lalrawnkima chuan Champhai Town Vending Committee thutkhawm chu nakin thlenga Champhai khawpui mawi leh felfai zawk siamna tura pawimawh tak a nih angin ngaihtuahna fim tak sen a ngaih thu a sawi a. Mawhphurhna neia hmala thintute pawh tun aia insangmar tur leh khawpui titawp lo leh mamawh lakkhawm kawnga awlsamna ngaihtuah chung zela ruahmanna siam thin turin a chah a ni.

He hunah hian UD&PA Department, NGO leh khawtlang hruaituten khawpui ti tawt lo tur leh mipui veivak tana hnawksak lo tura kawngsira inzawrh theihna hmun zirchianna an neih atanga rawtna lut hrang hrangte ngun taka zirchian a ni a, kawngsira inzawrh phalna hmun Vending Zone atan hmun 22 pawm a ni. Vengsang-ah 2 (Hospital Peng Market Shed leh Vengsang PCI Biakin Gate bul), Kahrawt vengah 5 (Dawrkaikawn YMA Hall Verandah, PHE Tankey bul sa zawrhna, PHE veng panna kawng chung Mizofed Office opposite, Dawrkaikawn Taxi Stand bul, Dawrkaikawn Auto Rickshaw Stand bul R.Lalngaihthangi In kawt), Vengthlang-ah 6 (Sangchia Building Verandah, Pu Thanrawia (L) Corridor, CTM-PACS Corridor, Lawmlawm Store leh Mizo dawr inkar Awmpuiphei, DM Hospital Opposite New Sharon panna peng bul, Hotel Chawngthu leh Bi’s Bakery inkar), Venglai huamchhungah 2 (Peter Munga Corridor, C.Denga Colony Opposite), Electric Veng huamchhungah 2 (Modern Meat Shop Ground Floor Verandah, Maawmi Variety Store Verandah), Vengthlang North-ah 1 (Vendors Market Shed, College Road), Kanan-ah 2 (Kanan Road-side Market Ground Floor leh First Floor), Bethel vengah 2 (Bethel kawn leh Forest Office hnuai Market Shed) te an ni. Inzawrh phalna hmun tih loh hmun dangahte kawngsira thil zawrh phal a ni lo a ni.

Thukhawm chuan inzawrh phalna tura ruatte chhinchhiahna siam tha a ti a. Thil zawrh leh dawrtu ten mipui leh lirhei veivak a tih buai loh nan inzawrh phalnain a huam chinte inhrilhhriat nise a ti a. Inzawrh phalna tura ruat niloa thil zuar awmte Line Department leh khawtlang hruaitute nen enfiah thin nise, thupek bawhchhia an awm chuan dan anga an chungah hmalak nise tih a ni bawk. Inzawrhna hmun tur duhte tan a tul dan ang zelin Bazarpui-ah seat pek theih a nih thu District Marketing Officer hnen atanga ngaihthlak a ni.

Vawiin Champhai Town Vending Committee thutkhawmah hian Member Secretary Pi R.Lalnunkimi, DUDO, member dangte leh sawm bikte an tel a ni.