No.4227/2021-2022

Vau thla ni 10, 2022: Vawiin khan Mizoram sawrkara Planning & Programme Implementation Department huaihawtin Central YLA Hall, Lawngtlaiah ram chhunga hma lakna peng hrang hrangah hmasawnna tluantling leh ngelnghet a awm theih nana hma lak dan tur zir hona, "workshop on monitoring and localisation of sustainable development goals (SDG)" buatsaih a ni.

He hun hmanpuitu Lawngtlai Bawrhsap Dr Andrew H. Vanlaldika chuan Lawngtlai District chhunga sawrkar department hrang hrangte'n mahni hma zawn theuhva District hmasawn nana hna an thawk chu thil lawmawm tak a nih rualin, hma lakna inthuah a awm loh nan leh awmze nei leh chhawrnahawm zawka hma lakna kalpui a nih theih nan department hrang hrang inrawn tlan leh thawh ho thiam a pawimawh tih a sawi a. Chuti anga department hma lakna kal tlanga hmasawnna ngelnghet a awm theih nan khaw tina village council leh tlawmngai pawlte an pawimawh tel bawk tih sawiin, mahni khua theuhvah hmasawnna ngelnghet a awm theih nan theih tawp chhuah tlan a tul a ni, a ti.

He hun hi Lawngtlai Sub-Divisional Officer (Sadar) Pi TT Beikhaizi chuan kaihruaiin, Planning & Programme Implementation Department-a Deputy Adviser cum Deputy Secretary Pi Biakthansangi Hrahsel chuan kal khawmte lawmna thu a sawi a. P&PI Department-a Research Officer Pi Lalkhumtiri chuan kal khawmte hnenah zirtirna a pe a ni.

He hunah hian SDG kalpuitu line department-a mawhphurhna nei official-te leh Lawngtlai District chhunga VCP-te an kal khawm a. Chawhma lamah District Indicator Framework Format chungchang zir ho niin, chawhnu lamah block leh village level-a SDG kalpui dan tur zir ho a ni thung.

Sustainable Development Goal (SDG) hi kum 2015-a United Nations General Assembly-in khawvel ram hrang hrangte'n hmasawnna ngelnghet an neih theih nana kum 2030 hma ngeia an tihhlawhtlin tur 17 a ruahman a ni a. Hei hi India ram paw'n tihhlawhtlin tumin, state leh district hrang hrangte pawh hemi tihlawhtling tur hian hma la turin a ti a, hma lak chhoh mek a ni.

SDG 17 zingah hian retheihna um bo, tam tihbo, hriselna tha, zirna tha, hmeichhia leh mipa intluk tlanna, tui thianghlim leh faina, ei leh bara hmasawnna leh kan chenna leilung leh chhehvel boruak humhalh te chu a langsar zual an ni.