No.4226/2021-2022

Aizawl the 10th March,2022: Vawiinah khan District Agriculture office buatsaihin an office kawtah Vaimim thar tam te lawmpuina leh Vaimim thar tam tura mamawh hlanna programme hman a ni.

He hun hi Pu F.Laltluangkima,BAO in kaihruaiin, Pu Lalsangliana, District bawrhsap chuan khuallian niin a hmanpui.

Pi R.Lalramhluni,DAO chuan introductory Speech sawiin, vawiin programme kan hawihawt chhan chu kan kuthnathawhtu thawh rah hi tipung leh zual turin an mamawh te pek leh anmahni cho phurh leh zual nan an hlawhtlinna te pholan saka, lawmpui hi a ni, a ti. Pi Rami chuan Offical chuan nemnghehna awm rih lo mahse Siata khua a mimala Vaimim 180qtls thartu Pu C.Zabiaka hi Mizorama vaimim thar tam ber a ni mai thei a ni, a ti.

Vawiin programme-ah hian thu sawiin; khuallian Pu Lalsangliana chuan DAO viak tha tak Pi R. Lalramhluni Siaha district in kan nei hi kan vannei hle a ni, Siaha ka lo thlen hma pawhin a hnathawh nasat thu hi ka lo hre tawh a, ka chhuang hle a ni. Kei pawh thingtlang pa ka ni a, kut hnathawhah hian ka mikhual lo viau a ni. Kut durh pheng phunga lo te pawh lo vat tawh thin ka ni avangin, kut hnathawhtu te hlawhtlinna hian min ti lawm em em a ni.DC anga ka ti theih chinah chuan kut hnathawhtute hi ka ral thlir mai mai lovang che u. Rim taka thawktute Pathian in a hawisan ngai lo, Pathian Malsawm tlakin lo thawk chhunzawm zel u la, ka tih theih chin leh phak chinah in tan ka ding reng dawn a ni, a ti bawk.

Vawiin peogramme-ah Siata Maize Grower Society leh Chhaolo Farming Society aiawh te thu sawina hun an hmang bawk.

Siaha district chhunga vaimim thar tam ber mi 4 te leh an tharchhuah zat te chu: 1st Pu C. Zabiaka,Siata ---180qtls
2nd Pu Beirasa,Chhaolô-- 150qtls
3rd Pu C. Thadô,Chhaolô----135qtls.
3rd Pu Khaihu,Siata---135qtls.

Vaimim thar tam te hi DAO office,Siaha in chawimawina thuziak leh lawmpuina tangkafai, 1st hnenah Rs.7000, 2nd hnenah Rs.5000 leh 3rd hnenah Rs.4000 theuh an buatsaih sak a, khuallian Pu Lalsangliana'n a hlan hlawm a ni.

Siaha District-ah hian Siata leh Chhaolô khua hi Vaimim thar tam thin khua an ni a, mahse hun engemaw tih lai atang khan vaimim hi an ching tam tawh lo a ni. Mizoramin Covid-19 hrileng a kan hma chhawn tir khan, ei leh barah harsatna namen lo hmachhawn theih leh tam theih dinhmun a ding kan nih avangin, chumi lak atanga kan dam khawchhuah theih nan bialtu MLA leh Minister ni bawk Dr. K.Beichhua chuan Siaha District Covid-19 Food Security and Consultative Committee (SDC-FSCC) a din a. Amah chu chairman ni nghalin, CEM,MADC leh 40Palak A/C bialtu MLA te chu Vice chairman an ni a, DC chu Member Secretary a ni thung.Commitee member-ah concern Line Dept a Head of office te ruat an ni. SDC-FSCC hian ei leh bara kan intodelh theih nan nasa takin hma a la a. Chutiang a a hmalakna pakhat chu Siata leh Chhaolo khua te vaimim thar tam tir leh tura hmalakna hi a ni. Tichuan vaimim chi 80qtls lakhawmin, Siata leh Chhaolô khua bakah khawdang 5 ah te semchhuah a ni. A hun taka vaimim te hi chin a ni loh avangin 2020 khan an thar tam lutuk lova, beidawng lovin vaimim chinah beihpui thlak leh in Kum 2021 atang chuan hlawhtlinna hmel an hmu tan ta a ni.

Nikum 2021 khan Siata khua in 1500qtls tharin, Chhaolo khua in 1350qtls an thar chhuak a ni. DAO taima leh viak tha Pi R Lalramhluni chu kum 2020 khan Siaha-ah rawn post tharin, Siata leh Chhaolo Vaimim hlawhtlinnaah hian a thawhhlawk hle a ni. DAO office hian nikum November thla-ah khan Chhaolô khuaah Vaimim Herhna khawl( Complete Maize Processing Machine) an lo bun sak tawh a He khawl hian hna 3 a thawk thei a, a kawr a kheh a, a mal a, a herdip theih nghal a ni. DAO office hian Vaimim herdip sa dahna tur Satha-ip leh a thuina(Sewing Machine) bakah a bukna (Weighing Machine) thleng in an pe a ni. Vawiin programme-ah hian DAO office,Siaha chuan vaimim thar tam ber te inkawlchhawk tur Vaimim Malhna khawl chu kum 2021 a Vaimim thar tam ber Pu C.Zabiaka kawl turin an hlan nghal bawk.

Kumin 2022 a Siata leh Chhaolô khuaa vaimim chingtu ten tam zawka an thar theih nan,DAO office,Siaha in zirchianna a neih hnuah vawiinah hian Siata leh Chhaolo khuaa Vaimim chingtute tan DC Pu Lalsangliana'n DAO office kawt atangin Bolero Pick up trip 3 an thawn/vailiam ta a ni. Chung thil thawn te chu:-

1) Vaimim Chitha(Improved Seeds) a chin hlawhtlin chuan kum 1 ah vawi 2 an thar thei dawn a ni.
2) Hlotur leh a akahna(Weedicides &Sprayers)
3)Rannung thahna hlo(Fall Army worm a lo awm chuan a kahna tur)

Vawiin programme hi Pu Vabeilaiku Chozah,ADAO in lawmthu sawina in a khar ta a ni.