Village Council inthlan lo awm tura inpuahchahna kal zelah vawiin khan Champhaia Returning Officer-te tan I&PR Auditorium-ah inthlan felfai tak a awm theih nan zirtirna pek an ni. He training hi Election Officer Pu Benjamin Lalzama’n kaihruaiin, zirtirna hi ERO Pu R. Zoremthara, Champhai BDO leh Pi Lalhruaitluangi, SDC ten an pe a ni.

Returning Officer-te pui tur Polling Officer leh Presiding Officer te chu State Election Commission-in a la ruat tur thu vawin hunah hian tarlan a ni a. Champhai District-ah hian V/C inthlan buaipuitu tura State Election Commision-in Returning Officer 108 a ruat a. Lengteng A/C hnuia V/C inthlana Returning Officer-te chu training hi ERO Pu Malsawmzuala, Ngopa BDO chuan training hi a pe a. Tuichang A/C huamchhunga Returning Officer-te chu ERO Pu Lalrinzuala, Khawzawl BDO chuan pe in, East Tuipui A/C huamchhunga Returning Officer-te chu ERO Pu James Lalnithanga, Khawbung BDO-in zirtirna a pe bawk.

Chamhai District-ah hian Village Council 108 awmin, seat 468 awmah 124 chu hmeichhe tan hauh a ni a. Champhai District-ah hian chhungkua 24,146 atangin vote thlak thei 79,415 an awm a. Polling Station 108 leh Polling Booth 120 leh Polling Compartment 160 ruahman a ni bawk.

Tarlan tawh angin tun V/C inthlanah hian in 200 chin hnuai lamah V/C member 3-ah hmeichhia 1, in 201 atanga 500-ah VC member mipa 5-ah hmeichhia 1, in 501 atanga 1000-ah V/C member 7-ah hmeichhia 2, in 1001 aia tamah V/C member 9-ah hmeichhia 3 awm turin seat hauh a ni a. Hmeichhe tana seat zuah bakah seat dang an chuh phalsak an ni bawk a. Village Council term kum thum ni thin kha term 5-ah pawh sei a ni bawk.