Vawin khan Block Resource Centre Mamit ah, Mamit District ah ziak leh chhiar thiamlo mi 7819 an awm avangin heng miten ziak leh chhiar an thiam theihna tur a beihpui Total Literacy Drive chu Pu Vanlalngaihsaka DC Mamit in a hawng.

Hawnna hun hi Pu C. Rodala DEO Chairman District Working Commitee on Total Literacy Drive chuan kaihruai a, hawnna thu sawiin DC chuan Mamit District ah lehkha thiamlo he ti zat an awm leh District pathum zinga pakhat kan ni ve erawh ramthim suttur kan nei chhah hle a, hmasawn tura ke pen angaih thu leh ziak leh chhiarthiamlo te thiam tir tura tan kan lak rual hian zirna lama hmasawnna duhawm lehzual kan neih theihna turin thiamna hmantlak leh chhenfakawm kan naupangten an neih theihnan thahnem ngai tak leh inpekna thar nen tanlak a ngai a ti a. Literacy rate ti hniamtu ni bik renglo tura beihpui thlak turin theihtawp i chhuah ang u a ti.

Pu HL Chawnghmingliana BRCC chuan hunserh a hmang a, Pu P.C. Lalthianghlima DPC in District Report pein, Pu TC Lalremsiama CAEO Directorate of School Education chuan thu a sawi bawk a, Pu Mickey R. Lalenkawla SDEO in lawmthu sawina hun a hmang bawk a ni.

Mamit District ah hian ziak leh chhiar thiamlo Mipa 2402 leh Hmeichhia 5417 Total 7819 an awm meka , athawh khatna ah hian mi 1000 thiam tir tum phawt a ni. Mamit Block atangin tan hmasak tum ani a, Mipakhat thiamtirnaah hian Zirtirtu ( animator) in Rs 300 zel a hlawh ang.