Vawiin chawhma dar 11:00 khan Champhai DC Conference Hall-ah Champhai DC Pu Vijay Kumar Bidhuri, IAS kaihhruaina in V/C General Election 2012 fel fai tak leh muanawm taka a kal theih nan Champhai District Level Standing Committee neih a ni. Hetah hian member te kokim tak kalin VC inthlanna tur chungchang an sawi ho a ni.

Committee kaihruaitu Pu Vijay Kumar Bidhuri, Champhai District Deputy Commissionr chuan kan hma lawka VC inthlan kan neih turah inthlanna fel fai leh muanawm tak a awm theih nan a Model Code of Conduct in kaihhruaina a lo siam tawhte tarlangin hemi atana ngaih pawimawh tur hrang hrang te a sawi a. State Election Commission in inthlanna thianghlim leh tha, tluang taka neih a nih theih nana an thuchhuah te chhiar in mitin in an vote hlu tak hmanga vote thlak theuh turin mitinte a sawm nghal a ni.

 DC chuan inthlanna hmun tur Polling Station tin te enfiah mek a nih thu sawiin vote thlak turte tana harsatna awm thei tur sutkian dan te, tuihnianghnar, electric, kawng tha leh bungrua mamawh dan tur te ‘spot verification’ neih mek a nih dan te sawiin EPIC nei lo tan pawh a duplicate copy pawisa tlemte chawiin rang taka siam sak theih anih thu a sawi bawk.

Pu James Lalnunmawia, DLAO in Model Code of Conduct chhiar chhuakin a sawifiah nghal zel a. Electoral Roll pawh tihfel vek tawh a niin, LAD Office atanga en theih anih thu leh party lam hruaitute pawh pek theih an nih thu a sawi.

 VC General Election 2012 atan hian 23rd February, 2012 (Ningani) a ni a. Zing dar 7:00 atanga tlai dar 4:00 thleng vote thlak theih a ni ang. Vote thlak zawh atangin vote chhiar nghal tur a ni a. 27th February, 2012 ah chuan inthlan hi zawh fel vek tawh tura ruat a ni. Champhai District bikah VIllage Council 105 a awm a, inthlan hmasak aiin seat 4 in a tam belh a ni. Chung Village Council neih belhna te chu Champhai Vengthlang, North Champhai Zion Veng, Khawzawl Kawnzar veng leh Khawzawl Hermon veng te an ni. Tuna VC inthlan neih turah hian Mizoram pum inthlan dan tur dinhmun chu hetiang hi a ni.