Mizoram sorkarin North East Games a thlenna turah Commonwealth Games-a India a mualpho ang khan NE Games-ah hian Mizoram mualpho kan remti lo, Pu Zodintluanga’n a ti. He thu hi vawiina ama pisa a meeting-ah sawiin, inbuatsaihna chak takin a kal chho mek a, game hrang hrang neihna tur pawh uluk leh chak taka ruahman mek a ni, a ti.

Mizoramin NE Games a thlenna turah hian Sports Minister Pu Zodintluanga chuan tunhnai lawka India-in Commonwealth Games a thlen tum khan sum hman phung leh hmalakna hrang hrangah namen lovin mualphona a tawk a, ram tan a zahthlak hle a. Mizoramin mualphona a tawh ve lohna turin hna hrang hrang leh kawng hrang hranga hma kan laknaah uluk takin vil a ni dawn a, Monitoring and Evaluation Committee pawh dinin Chairman atan Pu Rotluanga Fanai (Vice President MSSC), Secretary-ah Pu Rosangliana (Finance Secretary, MSSC) te an ni ang a. Member-ah Pu Laltlanthanga (Sr. Sports Promotion Officer); Pu John Kima (Joint Secretary, MSSC); Pu James Lalramnghaka (AE, MSSC); leh Pu Lalbiakthanga (SDO, PWD) te ruat an thu Minister chuan a sawi a ni.

Pu Zodintluanga chuan NE Games-ah hian a thlengtu kan nih avangin home advantage kan nei nasa a, Sports Association hrang hrang te pawhin chu chu hriain theihtawp an chhuah mek a, Mizoram hi titha ber nih tumin a inbuatsaih mek a ni, a ti bawk.

NE Games hi 19-24 March, 2012 chhunga neih turin a bul tumtu Sports Authority of India dawr mek a ni a, confirmation dawn thuai beisei a ni. Ruahmanna anga buatsaih a nih chuan March 19 hi thlenkim ni a ni anga, March 20 ah hawnna inkhawm, Inaugural Programme hman a ni ang a, March 23 ah Closing Ceremony neih a ni ang. Participants te hi March 24-ah an khaw lama haw leh hman tura beisei a ni.

Vawiin Meeting-ah hian Sports Secretary Pu R. Lalvena, Mizoram State Sports Council Secretary Pu Lianzuala bakah MSSC Officer leh OB te an tel a ni.