No.1883/2021-2022

Champhai, the 16th August, 2021: Champhai-Zokhawthar World Bank Road kawng laih chungchanga lungawilohna thlente ngaihtuahtu Grievances Redressal Committee (GRC) chu vawiin chawhnu dar 2 khan an Chairman, District Bawrhsap Pi Maria C.T Zuali hovin lungawilohna thlente chinfel dan tur ngaihtuahin DC Conference Hall-ah an thukhawm.

Pi Maria C.T Zuali chuan kawng laihin harsatna a thlente leh lungawilohna thuneitute hnena thehluhte ngaihtuahna hunah inremna leh lungawina siam a nih theih nan inbiakna tluang tak neih a tul thu a sawi a. Hmasawnna hnathawh thenkhatin chhiatna thlen chang awm thin bawk mahse, hnathawktu company, a tuartute leh sawrkar thuneitute chuan a chinfel dan ngaihtuahin dan angin lungrual takin hma an la tlang thin tur a ni, a ti.

Pu V.Lalruatliana, Special Land Acquisition Officer (SLAO) & Member Secretary, Grievances Redressal Committee chuan kawng laih dawnin zangnadawmna pek nan ram lak tur chinte zirchian thin a ni a, leivung paihna turte pawh uluk taka ngaihtuah tel thin a ni, a ti. Kawng lian laih avanga harsatna dang thleng thinte chu tul ang zela bawhzui thin a ni, a ti bawk.

PIU PWD Sr. AE Pu Hmingthanmawia chuan World Bank Project duhdan angin kawng laih leivung ten thlai huan a tihbuai loh nan fel fai taka paih vek tura hmalak thin a ni a, Champhai-Zokhawthar World Bank Road laih nan hmun 5 ah PIU in leivung paihna tur a ruat a ni, a ti a. Ram neitu leh Contractor ten inbiakremna an neih theih thu sawiin, PIU in a pawm chin leivung paihna baka Contractor-in a paih avanga harsatna awmte chu ram neitu leh Contractor inkar niin leivung paih vanga complaint tam zawkte chu hetiang hi a nih thu a sawi bawk.

Vawiin meeting-ah hian Champhai-Zokhawthar World Bank Road kawng laih avanga harsatna tuarte hnen atanga lungawilohna DC Office Champhaia thehluh 26 leh PIU a thehluh 1 chungchangte ngaihtuah niin, lungawilohna thlente hi mimal hmingin 19, VC 5, Kohhran 1, Co-operative Society 1 leh NGO atanga 1 te an ni. Leivung paihin a tihchhiat huan lo ram leh tuikawngte bakah kawng laih avanga leiminin harsatna a thlente PIU hotuten kalchilhin zirchiang se, zirchianna chu September ni 10, 2021 ral hmain Chairman, District Bawrhsap hnenah thehlut se tih a ni.

Vawiin Grievances Redressal Committee thutkhawmah hian District Official-te bakah PIU PWD atangin Pu V.Lalruatliana, Special Land Acquisition Officer (SLAO) & Member Secretary, Grievances Redressal Committee, Pu Hmingthanmawia Sr. AE leh Official dangte, TARMAT Company hotute, kawng laih avanga mimal huan lo ram tihchhiat sakte, VC leh NGO Coordination Committee Champhai hotute an tel a ni.