No.1877/2021-2022

Lawngtlai, Thlazing ni 16, 2021: Vawiin khan Mizoram sawrkara Sports & Youth Services Minister Pu Robert Romawia Royte chuan Lawngtlai College Vengah Lawngtlai Residential Sports School sak bul tanna lungphum a phum a. Lawngtlai Vengpuiah field awm sa tihchangtlunna tur leh Astro Turf Football Ground atana phullem phahna tur lungphum a phum bawk.

Sports Minister Pu Robert Romawia Royte chuan Lawngtlai District chuan infiamna hmunhma tha a neih loh avangin Mizoram sawrkar pawhin ngai pawimawhin, Lawngtlai District tan sports leh sports infrastructure lama hmasawnna turin hma lakna lian tak tak a ruahman tih a sawi a. Mizoram sawrkarin COVID-19 hripui avangin sum leh paiah nasa takin harsatna a tawk a, hetih laia Central Project hmanga Lawngtlai District-ah hmasawnna hna lian tak tak thawh a ni tur hi a lawmawm hle a ni tiin, Sports & Youth Services Department-in Lawngtlai District thalaite hmasawn nan Rs nuai 12,000 chuangin hna hrang hrang an thawk chho dawn tih a sawi.

Sports Minister chuan zirna leh sports kal kawptir a pawimawh thu sawiin, Mizoramin sports thiam bikte a bika enkawlna sikul a nei ve tur chu lawmawm a tih thu leh Lawngtlai mipuite'n an vanneih bikzia an hriat a beisei thu a sawi a ni.

Sports Minister chuan Pradhan Mantri Jan Vikas Karyakram (PMJVK) Scheme hmanga Lawngtlai District tihhmasawn dan tur tlangpui chu November ni 9, 2020-ah Chief Minister zahawm takin a lo puang chhuak tawh a, chu chu bawhzuiin sum sanction a ni ta a, First Installment pawh release a ni ta hlawm a ni tiin, a taka hna tan tura lung phum a ni ta hi a lawmawm hle a, Lawngtlai District Sports Complex leh Lunglei District Sports Complex te chu a Project a len tham avangin a lungphum phum tur pawhin Chief Minister kan beisei dawn a ni, a ti a. Project hrang hrang atan first installment pawh Mizoram Sawrkar kutah rawn release tawh a ni, a ti.

Lawngtlai East Bialtu MLA, Agriculture Development Board Vice Chairman ni bawk Pu H. Biakzaua chuan Mizoram sawrkarin sports leh a kaihhnawiha Lawngtlai District tihchangtlunna tur ruahmanna a siam a, a taka a hlawhtlinna hmel hmuh tur a awm ta chu lawmawm a tih thu sawiin, hemi atana ram petu LADC thuneitu, khawtlang hruaitu leh YLA hruaitute chungah lawm thu a sawi a, Lawngtlai District mipuite chu neitu thinlung pu-a hna thawktute pawh tha taka lo thawhpui turin a chah a ni.

Technical Report petu, Sports & Youth Services Director Pu Lalsangliana chuan Lawngtlai Residential Sports School hi Rs nuai 3,461.70 senga PMJVK Scheme atanga sak tur a nih thu sawiin 1st installment Rs nuai 1,557.77 dawn tawh a ni, a ti a. He sikulah hian Astroturf Football Field, Multipurpose Hall, Academic Building, Hostel Building 2, Teachers Quarters te leh Principal Quarters te a awm tur thu sawiin, infiam mite'n zirna tha dawng chunga sports an zirna tur a ni, a ti.

Lawngtlai Vengpui YLA Field tihchangtlunna tur leh phullem phahna tur atan hian PMJVK atang thovin Rs nuai 1,005.34 sanction a ni a, aum pawh 1st installment dawn tawh a ni.

Sports Minister hian Mampui khuaa PMJVK Scheme sum hmanga Rs nuai 5,019.43 senga Lawngtlai District Sports Complex sakna tur hmun pawh tlawhin, a enfiah nghal a. Lawngtlai District Sports Complex hian Athletic Ground, Futsal Ground, Basketball Court, Volleyball Court leh thil dangte a keng tel dawn a. Hemi atan hian 1st instalment Rs nuai 2,258.74 chu Mizoram sawrkar chuan a dawng tawh bawk a ni.

District Sports Complex hmun atana ruahman hi Lawngtlai khawpui atanga km 20 vela hlaa awm a ni a. Mampui khaw ram niin, he lai ram hi Lai Typical Village leh khualzin hipna atana cheibawl chhoh mek a ni a. Sports Minister hian Lai Typical Village buatsaih mek chu tlawh nghalin, Lawngtlai District Bawrhsap Dr Andrew H. Vanlaldika kaihhruainaa khawtlang leh mi inphalte tang rualin chuti ang thil tha tak an ruahman chu lawmawm a tih thu a sawi a. Sports leh Tourism chu kal kawp tlat a nih avangin District Sports Complex leh Lai Typical Village chu a inpui tawn thei dawn a ni tih sawiin, Lai Typical Village cheibawl chhoh zelna atan hian Rs nuai 10 a ruahmansak tur thu a sawi a. Mampui YLA kutah Computer full set a pe bawk a ni.

Tourism Minister Pu Robert Romawia Royte hian Lawngtlai Tourist Lodge bula Community Centre sakna tur hmun pawh tlawhin, hma lak dan tur a enfiah nghal a. Lawngtlaia Community Centre sak nan hian Rs nuai 236 ruahman niin, 1st instalment pek chhuah a ni tawh bawk.

Sports Minister hi Pu H. Biakzaua MLA, Agriculture Development Board Vice Chairman leh Dr K. Pachhunga MLA, Bamboo Development Board Vice Chairman te bakah, AMC Councillor Pu David Zohmangaiha, Sports Director Pu Lalsangliana, Lawngtlai Bawrhsap Dr Andrew H. Vanlaldika, LADC elected member-te leh sawrkar official-te leh Central YLA hruaitute'n an tawiawm a ni.

Attachment

  • Loading attachment...