No.2804/2021-2022

Aizawl, the 30^th October, 2021: District Sanitation Task Force thukhawmin plastic polythene bag hman tlem leh bansan kawnga chak lehzuala hmalak a rel bawhzui nan leh, luidung nungcha la puitling lo zawrh enfiah tura din Champhai District Enforcement Team-te tangkawp chuan tukin khan Champhai khawpui chhunga chawhmeh zawrhna Bazar hmun hrang hrangte an enfiah. Joint Inspection Team-te hi team hnihah inthenin DUDO leh BDO Champhaite kaihhruaiin Champhai khawpui chhunga chawhmeh zawrhna Bazar-te an enfiah a ni.

District  Sanitation Task Force, Champhai District-in Plastic Waste Management Amendment Rules, 2021 duhdan anga vawi khat chauh hman tlak polythene plastic bag hman thin bansana, bag tawih ral thei non woven bag leh a dang, hriselna leh leilung tana him zawkte Champhai District-ah hman a nih theih nana hmalak nise a tih bawhzui nan, Bazara chawhmeh leh thil dang zawrh leh leitute chu polythene hman ti tlem chhoa bansan a tul thu leh a nghawng thalote hrilhhriat an ni a. Khawtlang hruaitute pawh mipuiah zau zawka inzirtirna leh hriattirna siama hrilhhre tura ngen an ni bawk.

Tukin vek khan District Enforcement Team-te kaihhruaiin luidung nungcha la puitlinglo man leh zawrh enfiah a ni a. Chakai la puitlinglo 63 Rahsi veng Bazarpuiah man niin, Murlen National Park chhung luia chhuah turin Vapara Wildlife Guard hnenah vawiin khan hlan a ni.

Heng bakah hian DFO Champhai chuan Sakuh sa rep, Rahsi veng Bazarpuia zawrh lai khai 3, a vaiin 1 kg, Rs.900/- man hu a man bawk a. Sakuh hi nungcha humhalhna danah Schedule -IV hnuaiah dah a ni a, a tihlumtu leh zuartute chu kum 3 thleng lung in tan tir emaw, Rs 25,000/- chawitir emaw, a pahniha hrem kawp theih a ni. Sakuh sa zuartu leh petu ni a sawite chu DFO Office-a inlan tura hriattir nghal an ni a, thubuai kalpui chhunzawm zel dan tur sawiho a ni ang.

Mizoram sawrkar Director of Fisheries atanga hriattirna dawn bawhzuiin District Fisheries Conservation Board Chairman, Pi Maria C.T Zuali, District Bawrhsap ni bawk chuan District chhunga luidung nungcha la puitling lo leh ei tham loh (juvenile stage) man leh zawrh a nih tawh lohna turin DFDO Champhai kaihhruai Champhai District Enforcement Team chu October ni 20, 2021 khan a din a. Member dangte chu FD & AFO, SDPO Champhai, DFO Champhai, Champhai Nature Conservancy (CNC) President, Sub-Hqrs. YMA President, Champhaite an ni a. Din a nih atangin kartin vawihnih (2) Champhai Town Area huam chhunga luidung nungcha zawrh chhuahna hmunte tlawhin,  la puitling lo man leh zawrh chhuah a awm leh awm loh an endik a, a tul angin hma an la zui thin a ni.